Эпидемиологнинг фикрича, яқин олти ой ёки бир йил ичида карантин бекор қилинмайди

Ўзбекистон, Тошкент – Batafsil.uz ЯА.  "Ҳукумат чет элдан вирусни юқтириш хавфи бўлмагандан кейингина карантинни бекор қилади", - деди Вирусология илмий-тадқиқот институти бош илмий ходими, профессор- эпидемиолог Хайрулла Мустафоев. Эпидемиологнинг фикрича, яқин олти ой ёки бир йилда карантин режими бекор қилинмайди. Бу ҳақида мухбиримиз хабар бермоқда.

Мутахассиснинг "Правда Востока" газетасига берган интервьюсида Ўзбекистонда касалликнинг янги ҳолатлари вазият ёмонлашаётганини англатмайди, дейилган. Масалан, Европа ёки Россияда вирус тарқалиши сақлай олинмаганлиги туфайли беморлар сони кескин ошган. Ўзбекистонда эса бу жараён қатъий назорат остида турибди.

"Айтишимиз мумкинки, эпидемия кутганимиздек кечди. Биз унинг тарқалишини назоратга олиб, вирусни тўхтата олдик",- деди Хайрулла Мустафоев. Унинг айтишича, кейинги кунларда ватандошларимизни чет эл олиб келиш учун чартер рейслари қайта тиклангани сабабли беморлар сони кўпайишни бошлади. Кўпчилик коронавирус энди тарқалаётган ва авж олган мамлакатлардан келишмоқда.

Эпидемиолог карантиндан босқичма-босқич чиқиш кераклигини таъкидлади.

"Ўз-ўзини яккалаш ҳали ҳам зарур. Биз ўзимизни соғлом деб ўйлашимиз мумкин, аммо вирус ташувчиси бирон бир жамоат жойида йўклигига ким кафолат беради? Шунинг учун одамларнинг тўпланишига йўл қўйилмайди. Тиббий ниқоб тақишни унутманг. Бу нафақат ҳимоя, балки кексаларга эътибор ҳамдир", - деди у.

Хайрулла Мустафоевнинг таъкидлашича, вирус бошқа давлатларда тарқалаётган бир пайтда, Ўзбекистонда карантин режимини бутунлай бекор қилиб бўлмайди.

"Карантин режимининг тўлиқ бекор қилиниши ҳаракат чекловларининг олиб ташланишини англатади. Бироқ барча келаётганларни карантинга олишнинг иложи йўқ. Шу сабабли чегараларимиз ҳозирча ёпиқ. Биз чет элда, айниқса яқин қўшниларимизда пандемия тугашини кутишимиз керак. Ҳукумат чет элдан вирусни юқтириш хавфи бўлмагандан кейингина карантинни бекор қилади”, - деди у.

Эпидемиологнинг таъкидлашича, Ўзбекистон юқтирганлар сони энг кам бўлган давлатлардан бири саналади. Бироқ, кейинги олти ой ёки бир йилда аҳолининг олдинги ҳаётига қайтиши даргумон. Чегараларнинг очилиши сайёҳлар, мигрантлар ва кайтаётган ватандошларимиз орқали республика ҳудудига вируснинг кириб келиш хавфини келтириб чиқаради.

Мустафоевнинг сўзларига кўра, ўз-ўзини яккалаш режими хавф остидаги гуруҳлар учун амал қилишни давом этади. Бошқа фуқаролар ҳам алоҳида эҳтиёж бўлмаган тақдирда жамоат жойларига ташриф буюрмасликлари керак.