Ўзбекистон, Тошкент - Batafsil.uz. Марказий Африка Республикаси ва Камерун чегараси яқинидаги олтин конида юз берган ер кўчиши оқибатида юзлаб кишилар ҳалок бўлди. Маҳаллий ҳокимият маълумотларига кўра, қидирув-қутқарув ишлари давомида 107 нафарнинг жасади вайроналар остидан олиб чиқилган, бироқ қурбонлар сони яна ортиши мумкин.
Фожиа 18 август куни Марказий Африка Республикасининг Нана-Мамбере префектурасидаги Замбойе қишлоғида содир бўлган. Ҳудуд Камерун чегарасига яқин, Камеруннинг Гаруа-Булаи шаҳрига яқин жойлашган.
Дастлаб маҳаллий манбалар ҳалок бўлганлар сони 30 нафар атрофида эканини хабар қилган. Кейинроқ вайроналар остида қолганларни қидириш ишлари давомида 100 дан ортиқ жасад топилгани маълум қилинган. Айрим расмийлар қурбонларнинг аниқ сонини ҳозирча белгилаш қийинлигини билдирган.
Дастлабки маълумотларга кўра, фожиага ер остидаги бир нечта туннелнинг қулаши сабаб бўлган. Объектдаги қазиш ишлари асосан ҳунармандчилик усулида амалга оширилгани айтилмоқда.
Қидирув-қутқарув ишларида Қизил Хоч кўнгиллилари ва бошқа қутқарувчилар иштирок этмоқда. Вайроналар остида ҳали ҳам одамлар қолган бўлиши мумкинлиги сабабли қидирув ишлари давом эттирилмоқда.
Қурбонлар орасида Марказий Африка Республикаси ва Камерун фуқаролари бор. Камерун расмийлари камида уч нафар ўз фуқароси ҳалок бўлганини тасдиқлаган.
Маҳаллий ҳокимият ҳодиса юзасидан текширув бошлаган. Айни пайтда конда қанча киши бўлгани ва барча қурбонларнинг аниқ сонини белгилаш ишлари давом этмоқда.
Эслатиб ўтамиз, яқинда Индонезиянинг Шарқий Нуса-Тенгара провинциясида 7,7 магнитудали кучли зилзила содир бўлиб, камида 20 киши ҳалок бўлганди, олти киши жароҳатланган эди. Шунингдек, икки киши бедарак йўқолгани хабар қилинган.
Изоҳлар мавжуд емас