Ўзбекистон, Тошкент - Batafsil.uz. Ўзбекистонда кичик ва микроГЭСларни ривожлантириш доирасида каналлар, дарёлар ва сув ўзанларининг конструкциясини ўзгартиришга рухсат бериш режалаштирилмоқда. Бу орқали электр энергияси ишлаб чиқариш учун сув босимини ошириш имконияти яратилади.
Президент Шавкат Мирзиёевга қайта тикланувчи энергия манбалари асосида кичик ва микроэлектр станциялар тармоғини кенгайтириш бўйича янги чора-тадбирлар тақдимот қилинган.
Янги тартибга кўра, сув хўжалиги объектларида кичик ва микроГЭСларни аукцион ўтказмасдан, ўз эҳтиёжлари учун қуриш имконияти яратилади.
Лойиҳаларни амалга оширишни соддалаштириш мақсадида махсус рақамли платформа ҳам ташкил этилади. У орқали мос майдонларни аниқлашдан тортиб, станцияни қуриш, ишга тушириш ва кейинги фаолиятигача бўлган жараёнларни қамраб олиш режалаштирилган.
Шунингдек, кичик ва микроГЭСларни лойиҳалаш, қуриш ва ишлатиш бўйича ягона услубий қўлланма ишлаб чиқилади. Хусусий сектор иштирокида бундай лойиҳаларни амалга ошириш тартиби ҳам белгиланади.
Тақдимотда соҳанинг импортга қарамлигига ҳам алоҳида эътибор қаратилди. Ҳозирда кичик ва микроГЭСлар учун зарур гидроагрегатлар ва бутловчи қисмларнинг қарийб 90 фоизи хориждан олиб келинади.
Шу муносабат билан Ўзбекгидроэнерго жамияттнинг тажрибасидан фойдаланиш таклиф қилинган. Компания ҳозиргача 46 та кичик ва микроГЭС қурган.
Олдинроқ "Ўзбекгидроэнерго" ва Хитойнинг ТВЕА энергетика компанияси Тошкент вилоятидаги Қуйи Бўзсув каскадининг бир вақтнинг ўзида учта гидроэлектр станцияси - ГЭС-19, ГЭС-22 ва ГЭС-23ни модернизация қилиш бўйича шартномалар имзолаганди.
Изоҳлар мавжуд емас