Ўзбекистон, Тошкент - Batafsil.uz. Ўзбекистон Республикаси Марказий банки масофавий молиявий хизматлардан фойдаланиш тартибини енгиллаштириш ва баъзи хавфсизлик талабларини замонавийлаштиришга қаратилган низом лойиҳасини жамоатчилик муҳокамасига қўйди. Ҳужжат бўйича таклифлар 2026 йилнинг 1 августига қадар қабул қилинади.
Таклифга кўра, фойдаланувчиларни дастлабки рўйхатдан ўтказишда юзни масофавий биометрик текшириш (Liveness) талаби сақланиб қолади, бироқ кейинги босқичларда бир қатор енгилликлар берилади. Хусусан, телефон рақами фойдаланувчининг шахсий идентификация рақамига (ЖШШИР) мос келиши шартлиги бекор қилиниши кутилмоқда. Агар телефон рақами ота-она, фарзанд, турмуш ўртоғи ёки ака-ука ва опа-сингил номида бўлса ҳам, иловадан рўйхатдан ўтишга рухсат берилади.
Шунингдек, банк картасини иловага улашда юзни сканерлаш бекор қилиниб, фақат бир марталик бир лаҳзалик код (OTP) киритиш етарли бўлади. Янги қурилмадан аккаунтга кирилганда карталарни тўлиқ ўчириб ташлаш амалиёти ўрнига уларни вақтинча нофаол ҳолатга ўтказиш ва қайта фаоллаштиришда коддан фойдаланиш таклиф этилмоқда. P2P пул ўтказмалари бўйича эса тижорат банклари ва тўлов ташкилотларига ўз хавф-хатар (риск) сиёсатидан келиб чиқиб, қўшимча тасдиқлаш кодларини мустақил белгилаш ҳуқуқи берилади.
Бундан ташқари, антифрод тизимлари орқали фирибгарликдан ҳимоя қилиш, зарарли дастурлар аниқланганда PUSH-хабарномалар юбориш, пул ўтказмаларида олувчининг исм-фамилиясини қисман яшириш ва маълумотларни узатишда хавфсизлик протоколларини янгилаш кўзда тутилган.
Изоҳлар мавжуд емас