Ўзбекистон, Тошкент - Batafsil.uz. Dealroom.co халқаро таҳлил платформасининг ҳисоботига кўра, Ўзбекистон венчур инвестицияларининг ўсиш суръати бўйича жаҳон рейтингида биринчи ўринни эгаллади. Бир йил давомида мамлакатимиз стартаплари томонидан жалб қилинган молиялаштириш ҳажми 539,7 фоизга ортиб, дунё мамлакатлари орасида энг юқори кўрсаткич сифатида қайд этилди.
Тадқиқотчиларнинг қайд этишича, ушбу кўрсаткич бўйича юртимиз Кения (325,7 фоиз), Австрия (307,7 фоиз), Гана (278,3 фоиз) ва Покистандан (264,2 фоиз), шунингдек, кучли ўнликдан жой олган Хитой ҳамда АҚШ каби давлатлардан ўзиб кетган.
Бундай юқори натижа ўтган йилги паст база эффекти ҳамда Uzum ва TBC Uzbekistan иштирокидаги йирик битимлар ҳисобига таъминланган. Жорий йилнинг биринчи ярим йиллиги якунларига кўра, мамлакатда венчур капитали ҳажми 123 миллион доллардан ошган бўлса, миллий стартап тизимининг умумий қиймати 3,3 миллиард долларга етган.
Шу билан бирга, ҳисоботда бу пешқадамлик умумий сармоя миқдорига эмас, айнан ўсиш суръатига тааллуқли экани таъкидланган. Абсолют ҳажм бўйича АҚШ ва Хитой етакчиликни сақлаб қолаётган бўлиб, йилнинг дастлабки ярмидаги жаҳон венчур молиялаштиришининг қарийб 75 фоизи АҚШ ҳиссасига тўғри келган.
Аҳамиятлиси, экспертлар ушбу динамика юртимизда технологик тадбиркорлик имкониятлари кенгаяётганини ҳамда хорижий инвесторларнинг маҳаллий бозорга қизиқиши ортаётганини кўрсатишини билдирган.
Олдинроқ Ўзбекистонда венчур фондларини ривожлантириш ҳамда бизнесни узоқ муддатли сармоялар билан таъминлаш учун Бюджетдан ташқари пенсия жамғармаси ва хусусий пенсия фондлари маблағларидан фойдаланиш таклиф этилган эди.
Изоҳлар мавжуд емас