Ўзбекистон, Тошкент - Batafsil.uz. Бугун, 7 июль куни Ўзбекистонда илк бор ўтказилаётган Ислом цивилизацияси Халқаро форумининг очилиш маросими бўлиб ўтди. Давлат раҳбари Шавкат Мирзиёев анжуман қатнашчиларига йўллаган расмий табригида мазкур йирик тадбирнинг Тошкентдаги Ислом цивилизацияси марказида ташкил этилиши чуқур тарихий ва рамзий маънога эга эканини ҳамда жаҳон ҳамжамиятининг бой маънавий, илмий-маданий меросга бўлган қизиқиши ортиб бораётганини алоҳида таъкидлади.
Анжуманда дунёнинг 40 дан ортиқ мамлакатидан ташриф буюрган таниқли олимлар, нуфузли халқаро ташкилотлар вакиллари, давлат ва жамоат арбоблари ҳамда диний конфессиялар намояндалари иштирок этмоқда. Президент ўз мурожаатида бугунги глобал зиддиятлар, экстремизм ва исломофобия авж олган мураккаб шароитда Ўзбекистон томонидан илгари сурилган "Жаҳолатга қарши маърифат" ғояси тинчлик ва ижтимоий ҳамжиҳатликнинг ягона кафолати эканини қайд этган. Шунингдек, мамлакатда Ислом олами ва башарият ривожига улкан ҳисса қўшган Хоразмий, Ибн Сино, Имом Бухорий ва Имом Мотуридий каби алломалар меросини ўрганиш орқали Учинчи Ренессанс пойдевори яратилаётгани маълум қилинган.
Давлат сиёсатининг устувор йўналиши сифатида Самарқанддаги Имом Бухорий ёдгорлик мажмуасини қайта барпо этиш ва Ислом цивилизацияси марказини фан, инновация ва маърифатни бирлаштирувчи очиқ интеллектуал маконга айлантириш ишлари олиб борилмоқда. Шавкат Мирзиёев мазкур форум доирасида Самарқанд ва Термиз шаҳарларида ҳам илмий анжуманлар давом эттирилишини билдириб, хорижлик ҳамкорлар билан биргаликда глобал ҳамкорликнинг янги босқичи бўйича қўшма ҳаракатлар дастури қабул қилинишига умид билдирди ва анжуман ишига муваффақият тилади.
Изоҳлар мавжуд емас