Ўзбекистон, Тошкент - Batafsil.uz. Ўзбекистонда Ҳиндистоннинг Керала штатидан келган 22 ёшли тиббиёт университети талабаси вафот этди. Дастлабки маълумотларга кўра, қиз шифохонага ётқизилишидан олдин ўзбекистонлик ҳуқуқ-тартибот идоралари ходимлари унинг ўлимига алоқадорликда гумонланиб қўлга олган курсдоши билан жанжаллашиб қолган.
Onmanorama нашрининг марҳуманинг оиласига таяниб хабар беришича, воқеа бир неча кун олдин содир бўлган. Ўзбекистондаги тиббиёт олийгоҳларидан бирида таҳсил олаётган икки талаба ўртасида жанжал келиб чиқиб, муштлашувга айланиб кетган.
Дастлабки маълумотларга кўра, жанжал пайтида йигит талаба қизнинг бошига ноутбук билан урган.
Жабрланувчи оғир аҳволда шифохонага етказилган, бироқ шифокорлар томонидан кўрсатилган ёрдамга қарамай, у ички қон кетишидан вафот этган.
Гумонланувчи Ўзбекистонда қўлга олинган. Тергов давом этмоқда, қўшимча тафсилотлар ҳозирча ошкор этилмаган.
Эслатиб ўтамизки, аввалроқ Ҳиндистон фуқароси Сурхондарё вилоятида ҳуқуқ-тартибот идоралари ходимига пора беришга уриниш иши бўйича айбланган эди. Фуқаро йўл ҳаракати қоидаларини бузганлиги учун жавобгарликдан қочишга ҳаракат қилган.
Изоҳлар мавжуд емас