Ўзбекистон, Тошкент - Batafsil.uz. Ўзбекистонда техникумлар ва академик лицейлар учун миллий рейтинг тизими жорий этилди. Янги тартибга кўра, рейтингда энг юқори 50 ўринни эгаллаган техникумлар 1,2 миллиард сўмгача рағбатлантирилиши мумкин.
Маълум қилинишича, мазкур тартиб Адлия вазирлиги томонидан давлат рўйхатидан ўтказилган (3816-сон, 2026 йил 15 апрель). Миллий рейтинг Таълим сифатини таъминлаш агентлиги томонидан юритилади.
Рейтинг маълумотлари вазирлик ва идораларнинг ахборот тизимлари, таълим муассасалари тақдим этган ҳужжатлар ҳамда умуммиллий сўровнома натижалари асосида шакллантирилади. Ҳар йили 30 майга қадар ўқувчилар, педагоглар ва иш берувчилар ўртасида сўровнома ўтказилади, 10 октябрга қадар эса натижалар эълон қилинади.
Тартибга мувофиқ, ТОП-50 техникум БҲМнинг 3 000 баравари миқдорида молиявий рағбат олади. Ушбу маблағларнинг 80 фоизи моддий-техника базасини мустаҳкамлашга, 20 фоизи эса раҳбар ва ходимларни моддий қўллаб-қувватлашга йўналтирилади.
Эслатиб ўтамиз, Ўзбекистондаги техникум ўқитувчилари маошига 200 фоизгача устама олишлари мумкин бўлади. Ҳукумат томонидан тасдиқланган меҳнатга ҳақ тўлашнинг янги тартиби халқаро таълим дастурлари жорий этилган таълим муассасаларига тааллуқлидир.
Изоҳлар мавжуд емас