Ўзбекистон, Тошкент - Batafsil.uz. Ижтимоий тармоқларда тарқалган маълумотларга кўра, Сурхондарё вилоятида тўрт ёшли қизалоқ ўгай отаси томонидан кетмон дастаси билан уриб ўлдирилгани ва ҳолат масъуллар томонидан бости-бости қилингани айтилмоқда. Воқеанинг ягона гувоҳи бўлган она эса яқинлари томонидан мажбурий равишда руҳий касалликлар шифохонасига ётқизилган. Айни пайтда озодликка чиққан аёл фарзандидан айрилган ва адолат изламоқда.
Турдихоннинг ҳикоя қилишича, онаси вафотидан сўнг акаси ва янгаси уни уйга сиғдирмаган ва турмушга чиқишга мажбурлаган. Шу сабабли у ўзидан 10 ёш катта инсонга 34 ёшида турмушга чиққан. Аммо турмуш ўртоғи томонидан етказилган оғир тан жароҳатларидан сўнг, аёлнинг ҳаётида янада даҳшатлироқ давр бошланган. Бир нафар қиз фарзанд кўргандан сўнг у бу азоблардан қутулиш учун ота уйига қайтади.
Аммо кейинчалик аёл яна турмуш қуради ва ўз қизи билан иккинчи оиласида яшай бошлайди. Иккинчи турмушидан ўғил фарзанд кўргандан кейин унинг биринчи турмушидан бўлган қизига ёмон муносабат бошланади. Турдихоннинг айтишича, ҳатто эри икки фарзандини боқишни ва озиқ-овқат билан таъминлашни тўхтатади. Шу сабаб аёл кафеларда ишлаб, кун кўришга мажбур бўлади.
Иш сабабли иккинчи эри аёлни фоҳишага чиқарган ва мунтазам тарзда калтаклашга ўтган. Шундай калтакланишлардан бирида қизи унинг ёнини олмоқчи бўлиб, уни ҳимоя қилган ва орқасидан қучоқлаб олган. Эр эса хотинини аёвсиз уруш баҳонасида кетмон дастаси билан жажжи қизалоққа зарба берган. Қизалоқ бу вақтда атиги тўрт ёшда бўлган.
Олган тан жароҳатлари сабабли қизча эртаси куни вафот этган. Аёл маҳаллага ва инспекторга воқеа юзасидан мурожаат қилганда, ишни босди-босди қилиб юборишган ва аёлни қўрқитишган. Хусусан, маҳалла инспектори ҳамма иш уни қўлидан ўтишини айтиб, урингани билан ҳеч нима қила олмаслигини билдирган.
Кейинчалик у ёлғиз ўзи яна ота уйига қайтганда, дастлаб янгаси бир хонани унга беради. Аммо икки кундан сўнг ўз акаси ва янгаси Турдихоннинг ҳаётини барбод қилиш мақсадида, уни мажбуран руҳий касалликлар шифохонасига ётқизишган.
"Шифокорларга ёлвордим, мени текширинглар, мен тентак эмасман дедим. Лекин акам ва янгам "умрбодга" деб ариза ёзишган экан", — дейди кўзида ёш билан аёл.
Турдихон бир йил давомида шифохонада сақланган. Энг ачинарлиси, суҳбат жараёнида мутахассислар аёлнинг руҳий ҳолатига нима учун тўғри баҳо беришмагани ва жигарларнинг аризаси қандай қилиб асосий ҳужжат бўлиб хизмат қилгани очиқ қолмоқда. У маҳалласига қайтганда ногиронлик учун оладиган нафақасини акаси ва янгаси олиб, ўз эҳтиёжи учун ишлатаётгани очиқланади. Чунки жиннихонага тушганда унга ногиронлик берилган. Амалдаги қонунчиликка кўра, бундай шахсларга давлат томонидан ногиронлик нафақаси тайинланади.
Турдихонни бугунги кунда қийнаётган энг катта дард — фарзанди билан кўриша олмаётганидир. Узоқ вақт давомида жисмоний ва руҳий босимлар остида қолган она эндиликда ўз боласини кўриш учун қонуний йўл изламоқда. 102 рақамига қўнғироқ қилганда унинг рухий ҳолати сабабли аризаси қабул қилинмаган.
Фарзандини кўришга борганида маҳалла раиси уни яқинлаштирмаган, мактабда эса ўқитувчилар ҳам тўсқинлик қилган. Фақатгина бир марта боланинг яшаётган уйида уни кўрган ва бола "бу ердан тезроқ кетинг, отам кўрса ўлдиради", деган.
Суҳбат давомида мутахассислар аёлга руҳий ва ҳуқуқий ёрдам бериш зарурлигини таъкидлашган. Айниқса, бундай мураккаб вазиятларда она ва бола ўртасидаги алоқани тиклаш учун Мажбурий ижро бюроси (МИБ) ва суд органларининг иштироки муҳимлиги тушунтирилган.
Мазкур мурожаат асосида мутахассислар гуруҳи аёлга бола билан кўришиш тартибини суд орқали белгилаш ва МИБ томонидан ижросини таъминлашни, бошидан кечирган оғир дамлар ва "жиннихона" тамғасидан халос бўлиш учун руҳий мададни, аёлнинг яшаш шароити ва яқинлари билан бўлган низоли муносабатларини ўрганишни режалаштирган.
Турдихоннинг тақдири — жамиятимиздаги оилавий зўравонлик ва яқин инсонлар ўртасидаги меҳр-оқибатнинг йўқолиб бораётганининг аччиқ намунасидир. Бир аёлнинг "мен соғломман" деб ёлворишига қарамай, уни йиллаб шифохонага қамаш — бу нафақат жиноят, балки инсонийликка қарши адолатсизликдир.
Изоҳлар мавжуд емас