Ўзбекистон, Тошкент - Batafsil.uz. Ўзбекистонда қурилиш соҳасида туб бурилиш кутилмоқда. Президент Шавкат Мирзиёев топшириғига кўра, қурилишга рухсат олишдан тортиб объектни фойдаланишга топширишгача бўлган барча босқичлар қайта кўриб чиқилади. Асосий мақсад — ортиқча қоғозбозликни бартараф этиш ва коррупция хавфини кескин камайтириш.
Расмий маълумотларга кўра, ўтган йили соҳада 2,6 миллиондан зиёд ариза келиб тушган бўлса, уларнинг қарийб учдан бири рад этилган. Бу ҳолат инсон омили билан боғлиқ муаммоларни яна бир бор кўрсатган. Шу боис, эндиликда жараёнларни сунъий интеллект ва рақамли тизимлар орқали автоматлаштиришга устувор аҳамият берилмоқда.
Янги тартибга кўра, 1 июлдан бошлаб лойиҳалашга рухсат олиш ва архитектура режалаштириш топшириғини тайёрлаш хизматлари бирлаштирилади. Илк бор Тошкент шаҳрида синовдан ўтган бу амалиёт бутун республика бўйлаб жорий этилади.
Коммунал тармоқларга уланишда ҳам сезиларли енгилликлар бўлади. Электр, газ, сув ва канализацияга уланиш учун эндиликда турли идораларга югуриш талаб этилмайди. Фуқаролар ва тадбиркорлар битта ариза ва ягона тўлов орқали барча техник шартларни олиш имконига эга бўлади.
Соҳадаги қарор қабул қилиш жараёнларини тезлаштириш мақсадида шаҳарсозлик кенгашларига ҳам янги ваколатлар берилмоқда. Уларга бевосита вилоят ва Тошкент шаҳри ҳокимлари раҳбарлик қилади. Бу эса тадбиркорлар муаммоларини жойида ва тезкор ҳал этишга хизмат қилиши кутилмоқда.
Шу билан бирга, адолатли рақобатни таъминлашга қаратилган қатор янгиликлар ҳам жорий этилмоқда. Хусусан, "Шаффоф қурилиш" рейтингида лизинг асосида олинган техникалар ҳам инобатга олинади. Бу эса юзлаб корхоналарга катта бозорга чиқиш имконини очади.
Шунингдек, пудрат ташкилотлари учун чет элдан махсус техника олиб келишдаги чекловлар бекор қилинади.
Мутасаддиларга эса аниқ вазифа қўйилди: уч ой ичида қурилиш соҳасидаги барча талаблар, муддатлар ва тўловларни камида икки баробарга қисқартириш бўйича ҳукумат қарори лойиҳасини ишлаб чиқиш.
Кутилаётган бу ўзгаришлар қурилиш соҳасини янада очиқ, тезкор ва инвестициялар учун жозибадор қилишга қаратилган.
Изоҳлар мавжуд емас