Янги ОТМ ва йўналишлар. Жорий йилда очиладиган ОТМ ва уларнинг филиаллари рўйхати эълон қилинди

Ўзбекистон, Тошкент – Batafsil.uz. Адлия вазирлиги жорий йилда очиладиган   ОТМ ва уларнинг филиаллари рўйхатини эълон қилган. Бу ҳақда мухбиримиз хабар бермоқда.

Хусусан, 2021/2022 ўқув йилидан бошлаб:

• Мирзо Улуғбек номидаги Ўзбекистон Миллий университетида “Гидрометеорология” факультети очилади;

• Тошкент вилоятида Тошкент ахборот технологиялари университети филиали ташкил қилинади;

• Тошкент давлат аграр университетининг Нукус филиали негизида Қорақалпоғистон қишлоқ хўжалиги ва агротехнологиялар институти очилади;

• Ўзбекистон давлат консерваториясининг Нукус филиалида ўқув жараёни бошланади;

• “Ипак йўли” туризм халқаро университети, Тошкент давлат иқтисодиёт университети, Бухоро ва Термиз давлат университетларида “зиёрат туризми”, “транспорт логистикаси” ва “ижодий саноат” (creative industry) магистратура мутахассисликларида кадрлар тайёрлаш тизими йўлга қўйилади;

• Андижон иқтисодиёт ва қурилиш институти ўз фаолиятини бошлайди;

• Тошкент архитектура-қурилиш институти ва Самарқанд давлат архитектура-қурилиш институтида маданий мерос объектларини асраш факультетлари очилади.