Ўзбекистон, Тошкент - Batafsil.uz. Ўзбекистон Бутунжаҳон ядро ассоциациясининг (WNA) Лондонда бўлиб ўтган 51-симпозиумида атом энергетикасини ривожлантириш бўйича ўз миллий моделини эълон қилди. "Ўзатом" агентлиги томонидан тақдим этилган ушбу лойиҳа йирик қувватли VVER-1000 энергоблоклари ва кичик қувватли RITM-200N реакторларини ягона тизимга мужассамлаштирган дунёдаги биринчи интеграциялашган АЭС модели сифатида халқаро эътирофга сазовор бўлган.
Тадбир доирасида "Ўзатом" делегацияси соҳанинг етакчи жаҳон компаниялари ва ташкилотлари билан аниқ амалий келишувларга эришган.
Orano компанияси билан ядро ёқилғиси цикли ҳамда чиқиндиларни қайта ишлаш бўйича ҳамкорлик қилиш, шунингдек, ўзбек мутахассисларининг Франциядаги ядро объектларига ташрифини ташкил этишга келишилган.
Бутунжаҳон ядро ассоциацияси ва университети билан Ўзбекистоннинг WNA таркибига тўлиқ аъзо бўлиши, минтақавий таълим дастурларини йўлга қўйиш ва мамлакатни халқаро университет тадбирларига мезбон номзод сифатида киритиш масалалари маъқулланган.
Канаданинг CANDU реакторлари имкониятларини ўрганиш ва уларни Ўзбекистон шароитида қўллаш мақсадга мувофиқлигини баҳолаш бўйича музокаралар ўтказилган.
Анжуман якунида Руанда атом энергетикаси раҳбарияти билан ҳам тажриба алмашиш ва қўшма лойиҳаларни амалга ошириш бўйича келишувга эришилган.
Изоҳлар мавжуд емас