Ўзбекистон, Тошкент - Batafsil.uz. Екатеринбургнинг Кольцово аэропорти божхоначилари Ўзбекистондан учиб келган икки йўловчининг юклари орасидан ноқонуний равишда олиб киришга уринилган пичоқларни аниқлашди. Уларнинг умумий вазни 23,5 килограммни ташкил этган.
14 сентябрь куни Кольцов божхонаси ходимлари томонидан ўтказилган текширув давомида йўловчиларнинг бирининг қўл юкидан 62 дона, иккинчисининг сумкаларидан эса 59 дона миллий нақшлар билан безатилган, аммо тегишли маркировкага эга бўлмаган пичоқ топилган. Жами 121 дона пичоқ аниқланган. Олиб ўтувчилар ушбу маҳсулотларни яқинларига совға сифатида олиб кетаётганини маълум қилишган.
Ўтказилган экспертиза хулосасига кўра, ушбу буюмлар ўзбек миллий "Пичоқ"ларининг қўлбола нусхалари экани тасдиқланган. Текширилган пичоқларнинг аксарияти хўжалик ва маиший фойдаланишга мўлжалланган буюмлар деб топилган бўлса-да, уларнинг 15 донаси совуқ қурол тоифасига киритилган.
Ҳодиса юзасидан товарларни декларация қилмаслик бўйича Россия Федерацияси Маъмурий жавобгарлик тўғрисидаги кодексининг 16.2-моддаси 1-қисми билан иккита маъмурий иш қўзғатилган.
Олдинроқ Таиланддан Ўзбекистонга олиб кирилган 4,6 килограмм мефедрон синтетик гиёҳвандлик моддаси ва 635 грамм "Альфа-PVP" наркотиги мусодара қилинганди.
Изоҳлар мавжуд емас