Ўзбекистон, Тошкент - Batafsil.uz. Ўзбекистон терма жамоаси аъзолари 11–14 август кунлари Жанубий Кореяда ўтказилган 21-Халқаро Стандартлар Олимпиадаси (ISO 2026) ҳамда Тошкент мезбонлик қилаётган 38-Халқаро информатика олимпиадасида (IOI 2026) жами 7 та медални қўлга киритди. Бу натижа мамлакат тарихидаги энг юқори кўрсаткич бўлди. Ўзбекистон вакиллари учта олтин, битта кумуш ва учта бронза медалига эга чиқди.
Хабарда билдирилишича, Сеул шаҳрида 20 дан ортиқ давлат вакиллари орасида кечган ISO 2026 мусобақасида Бухоро ва Жиззах шаҳарларидаги Президент мактаблари ўқувчилари Асадбек Бахронов, Феруза Луқмонова ҳамда Саидакбар Жаҳоналиев мутлақ ғолибликни қўлга киритиб, учта олтин медални жамоа ҳисобига ёздириб қўйган. Ваҳоланки, жамоавий ишлаш ва мураккаб таҳлилий ечимларни талаб этадиган ушбу беллашувда вакилларимиз юқори тайёргарлик ва маҳорат намойиш этган.
Шунингдек, муваффақиятлар занжири пойтахтимизда ўтказилаётган ва 90 дан ортиқ мамлакатнинг энг иқтидорли дастурчилари қатнашаётган IOI 2026 беллашувларида ҳам давом этган.
Аниқроқ айтганда, IT соҳасидаги бу саралашда Муҳаммад ал-Хоразмий номидаги ихтисослаштирилган мактаб ўқувчиси Жахонали Хайдаралиев кумуш медални, шунингдек, Наманган ва Нукус шаҳарларидаги Президент мактаблари тарбияланувчилари Жаҳонгиршоҳ Авазхонов, Тимур Кадирбергенов ҳамда Улуғбек Раҳматуллаев учта бронза медалини қўлга киритган.
Шу билан бирга, 2025 йилги олимпиадада атиги 1 та кумуш ва 1 та бронза олинганини ҳисобга олсак, бу йилги натижалар мамлакатимиз вакиллари учун ҳақиқий рекордга айлангани алоҳида таъкидланмоқда. Бунга қўшимча равишда, навоийлик Сардорбек Салимов ҳам дипломантлар қаторидан жой олиб, умумий зафарга ўз ҳиссасини қўшган.
Изоҳлар мавжуд емас