Ўзбекистон, Тошкент - Batafsil.uz. Қирғизистон президенти Садир Жапаров ОАВга берган интервьюсида 2027 йилда президентлик муддати якунлангач, ҳокимиятни Қамчибек Ташиевга топшириш режаси бўлганини, бироқ кейинчалик ундан воз кечганини маълум қилди. Президентнинг билдиришича, бунга Ташиев атрофидаги шахсларнинг хатти-ҳаракатлари, жамиятда бўлиниш эҳтимоли ва парламентда юзага келган можаролар сабаб бўлган.
Хабар қилинишича, давлат раҳбари 2027 йилда олти йиллик муддати тугагач, президентлик сайловида қатнашмасдан ҳокимиятни Ташиевга топшириш ва дам олишга кетишни режалаштирганини айтиб ўтган. Ваҳоланки, собиқ мулозимнинг шогирдлари ва атрофидаги шахслар ўзларини муносиб тутмагани ҳамда жамиятни бўлишга уринишлар пайдо бўлгани боис бу режа бекор қилинган.
Аслида, Қамчибек Ташиев беш йил давомида самарали фаолият юритган бўлса-да, ўз доирасидаги инсонларнинг хатти-ҳаракатларини жиловлай олмагани унинг асосий камчилигига айланган.
Аниқроқ айтганда, парламентни генерал хайрихоҳларига бўлиш ва "75 лар хати" билан боғлиқ можаролар юзага келгач, Жапаров уни ҳузурига чақириб, лавозимдан олиш ҳақидаги қарорини билдирган. Шундай бўлса-да, президент Ташиев у билан шахсий дўст бўлиб қолишини ва унинг мамлакат ривожига қўшган ҳиссаси катта эканини эътироф этган.
Шунингдек, Бишкек суди собиқ МХДҚ раҳбарини тегишли иш бўйича айбдор деб топиб, мол-мулкини мусодара қилиш билан бирга 4 йилга озодликдан маҳрум этиш ҳамда 3 йиллик пробация назорати жазосини тайинлаганди. Бунга қўшимча равишда, собиқ раҳбарга келажакда мустақил равишда сайловларда қатнашиш имконияти сақлаб қолиниши билдирилган.
Изоҳлар мавжуд емас