Ўзбекистон, Тошкент - Batafsil.uz. Ўзбекистон Республикаси Марказий банки томонидан эълон қилинган Бизнес кайфияти шарҳида мамлакатдаги тадбиркорлик муҳити, иқтисодий фаоллик ва бизнес вакилларининг кутилмалари таҳлил қилинди. Улар иқтисодий ўсиш кузатилишига қарамай, газ ва электр таъминотидаги узилишлар, ички талабнинг сустлиги, ёқилғи нархи ошиши ҳамда логистика муаммолари тўлиқ қувватда ишлашга тўсқинлик қилаётганини билдирди.
Расмий эълон қилинган маълумотларга кўра, электр ва газ таъминотидаги узлуксизлик муаммоси тадбиркорлар фаолиятига энг катта салбий таъсир кўрсатаётган омил сифатида қолмоқда. Ишлаб чиқариш жараёнларининг тўхтаб қолиши ва маҳсулот етказиб беришдаги узилишлар айнан энергия ресурслари танқислиги билан боғланмоқда.
Шунингдек, корхоналар энергетик чекловлар сабабли ўз ишлаб чиқариш қувватларидан тўлиқ фойдалана олмаётганини ва бу ҳолат даромадларнинг камайишига олиб келаётганини таъкидлаган. Ушбу муаммо айниқса саноат ва хизмат кўрсатиш соҳасидаги тадбиркорлик субъектларига жиддий қийинчиликлар туғдирмоқда.
Бундан ташқари, ўтказилган сўровда ижобий ўзгаришлар ва келажакка бўлган ишонч ортгани ҳам қайд этилган. Хусусан, тадбиркорларнинг 64 фоизи бизнес юритиш шароитлари яхшиланганини билдирган бўлса, 82 фоизи иқтисодий муҳитнинг янада яхшиланишига ишонч билдирган.
Маълум бўлишича, ушбу тадқиқот республиканинг барча ҳудудларидан келган 2 минг 391 нафар тадбиркор ўртасида ўтказилган.
Изоҳлар мавжуд емас