Ўзбекистон, Тошкент - Batafsil.uz. АҚШ ҳукумати эълон қилган махсус ҳисоботда Хитой 40 дан ортиқ мамлакат, жумладан Ўзбекистон ва Қозоғистон орқали ўз товарларини қайта маркировкалаб, Американинг юқори божхона тўловларини айланиб ўтгани билдирди. Ушбу жисмоний ва логистик айланмалар ортидан Вашингтон йилига 19 миллиарддан 26 миллиард долларгача молиявий зарар кўраётганини таъкидлаб, ноқонуний қайта юклаш тизимига қарши қатъий чоралар кўрилишини маълум қилди.
Маълумотларга кўра, Вашингтон Пекинни учинчи мамлакатларнинг арзон ишчи кучи, эркин иқтисодий зоналар ва логистика марказларидан фойдаланиб, маҳсулотларга арзимаган ишлов бериш орқали келиб чиқиш мамлакатларини сохталаштирганликда айблаган.
АҚШ томони ушбу "катта фирибгарлик" оқибатида мамлакат ички бозорида 450 мингга яқин иш ўрни йўқотилганини билдирмоқда.
Шунингдек, Оқ уйнинг Савдо ва ишлаб чиқариш сиёсати бошқармаси Хитой товарларини қайта юклаш амалиёти жуда пухта йўлга қўйилган ва учта асосий тоифадаги давлатлар орқали амалга оширилганини билдирган.
Аниқроқ айтганда, Марказий Осиё минтақасидаги Ўзбекистон ва Қозоғистон, шунингдек Озарбайжон ва Грузия "Бир макон — бир йўл" ташаббуси доирасидаги муҳим транзит нуқтасига айланган. Шундай бўлса-да, АҚШ маъмурияти бу каби ножўя схемалар Америка ғазнасини ўмаришга хизмат қилаётганини алоҳида қайд этган.
Шу билан бирга, АҚШ томони Канада ва бошқа иттифоқчиларини ҳам Хитой билан савдо келишувлари ёки электромобиллар импортини ошириш борасида огоҳлантириб, янги чекловчи божлар жорий этилиши билан таҳдид қилган. Бунга қўшимча равишда, ноқонуний қайта юклаш схемаларига чек қўйиш учун чегара ва божхона назорати янада кучайтирилиши таъкидланган.
Олдинроқ АҚШ президенти Дональд Трамп Канадада ишлаб чиқарилган айрим товарларга, жумладан вино, хоккей таёқчалари ва цементга 50 фоизлик импорт божини жорий қилганди. Оқ уйга кўра, бу қарор Канаданинг Америка маҳсулотларига нисбатан "камситувчи муносабати"га жавоб сифатида қабул қилинган.
Изоҳлар мавжуд емас