Ўзбекистон, Тошкент - Batafsil.uz. 2026 йилнинг январь–июнь ойларида Давлат ижтимоий суғуртаси жамғармаси томонидан 66 мингдан ортиқ аёлга хомиладорлик ва туғиш нафақаси расмийлаштирилди.
Ижтимоий суғурта жамғармаси раҳбари Нодир Муслиддинов Ижтимоий ҳимоя миллий агентлиги, Ўзбекистон иш берувчилар конфедерацияси ҳамда жамғарма ҳамкорлигида ташкил этилган очиқ мулоқотда маълум қилишича, ушбу давр мобайнида декрет пулларини молиялаштириш учун давлат бюджетидан жами 772 миллиард сўм маблағ йўналтирилган.
Мамлакат бўйича нафақа олган аёлларнинг асосий қисми, яъни 55 минг нафари (83 фоизи) давлат секторида фаолият юритадиган ходимлар ҳиссасига тўғри келган. Хусусий секторда меҳнат қилаётган 11 минг нафар (17 фоиз) аёлга эса жами 163 миллиард сўм декрет тўловлари ажратилган.
Қувонарлиси, хусусий секторда мазкур нафақани олувчилар сони ўтган йилнинг мос давридаги 6 минг нафардан 11 минг нафарга етиб, қарийб икки бараварга кўпайган.
Эслатиб ўтамиз, бу кўрсаткич 2026 йилнинг биринчи чорагида 378,6 миллиард сўм бўлганди. Жорий йилнинг 1 январидан бошлаб мазкур нафақалар Давлат ижтимоий суғурта жамғармаси томонидан проактив шаклда тайинланиши йўлга қўйилган эди.
Изоҳлар мавжуд емас