Ўзбекистон, Тошкент – Batafsil.uz. Ўзгидромет шошилинч хабар тарқатган. Синоптикларнинг маълум қилишича, ҳафта охирида ҳаво ҳарорати 25-28 даражагача пасайди, ёмғир ёғиши ва шамол эсиши кутилмоқда. Бу ҳақда мухбиримиз хабар бермоқда.
“Жорий йилнинг 10-12 сентябрь кунлари Ўзбекистон ҳудудига Волга бўйи ҳудудларидан бироз нам ва салқин ҳаво кириб келади. 10-12 сентябрда республика ҳудуди бўйича баъзи жойларда шамол 15-18 м/с гача кучайиши, айрим жойларда чанг-тўзонлар кузатилиши кутилмоқда”, -дея билдиришмоқда синоптиклар.
11 сентябрда Сурхондарё вилоятида ва Фарғона водийси вилоятларида шамолнинг кучайиши баъзи жойларда 20-23 м/с га етиши мумкин.
11 сентябрь куни Тошкент, Самарқанд, Жиззах, Сирдарё вилоятларида, 12 сентябрда Фарғона водийси вилоятларида бироз ёмғир ёғади. Республиканинг тоғли ҳудудларида ёмғир ёғади, баланд тоғларда (2500 м дан юқори) ёмғир қорга айланиши мумкин.
11-12 сентябрь кунлари республика ҳудудининг катта қисмида ҳаво ҳарорати кечалари 10-13° гача, кундуз кунлари 25-28° гача пасаяди.
Изоҳлар мавжуд емас