Ўзбекистон, Тошкент - Batafsil.uz. Россия ва АҚШ президентлари Владимир Путин ва Дональд Трамп Ўзбекистон раҳбари Шавкат Мирзиёев ҳамда мамлакат халқини Мустақиллик куни билан табрикладилар.
Ўз табрик телеграммаларида икки давлат раҳбарлари мамлакатнинг ютуқларини қайд этиб, ҳамкорликни мустаҳкамлашдан манфаатдор эканликларини билдирдилар.
Путин таъкидлашича, Ўзбекистон минтақавий ва халқаро кун тартибидаги кўплаб муҳим масалаларни ҳал этишга конструктив ҳисса қўшмоқда. Республика ва Россия ўртасида МДҲ, ШҲТ ва бошқа кўп томонлама тузилмалар доирасида самарали ҳамкорлик йўлга қўйилган.
"Ишончим комилки, биз келгусида ҳам барча йўналишларда ўзаро манфаатли Россия–Ўзбекистон алоқаларини янада ривожлантирамиз. Бу бизнинг дўстона халқларимиз манфаатларига тўла жавоб беради, Марказий Осиёда хавфсизлик ва барқарорликни мустаҳкамлаш йўналишида ҳамоҳангдир", — деб ёзди Россия раҳбари.
Трамп бу байрамни мамлакат тарихи ва бой маданиятини эслаш учун қувончли сабаб сифатида атади. Унинг таъкидлашича, мустақилликка эришилганидан бери Ўзбекистон аҳамиятли ислоҳотларни амалга ошириб келмоқда ва бу ислоҳотлар республика билан АҚШ ўртасидаги динамик стратегик ҳамкорликка хизмат қилмоқда.
"Биз умумий манфаатларни илгари суриш учун катта ҳамкорлик ишларини амалга оширдик. Бу саъй-ҳаракатлар чегараларимизни мустаҳкамлаш, икки томонлама савдо ва инвестицияларни ошириш, шунингдек, дин эркинлиги ва минтақавий барқарорликка кўмак беришни ўз ичига олади. Қўшма Штатлар мавжуд алоқаларни мустаҳкамлаш ва ўзаро манфаатли ҳамкорлик учун янги имкониятлар очилишини кутмоқда", — дейилади АҚШ раҳбарининг табригида.
Ўзбекистон халқига табрик йўллаганлар қаторида Хитой Халқ Республикаси Раиси Си Цзиньпин ҳам бор. Унинг таъкидлашича, республика барқарор қадамлар билан стратегик мақсад — Янги Ўзбекистонни барпо этиш сари йўл олмоқда.
"Сиз билан биргаликда сиёсий ўзаро ишончни чуқурлаштириш, бир-биримизни қатъий қўллаб-қувватлаш, ривожланиш стратегияларимизни уйғунлаштириш, "Бир макон, бир йўл" ташаббусини юқори сифатда биргаликда амалга ошириш ва шу орқали Хитой–Ўзбекистон ягона тақдир ҳамжамиятини янада чуқурлаштиришга хизмат қиладиган ишларга тайёрман", — дейилади Хитой раҳбарининг табригида.
Шунингдек, Қозоғистон, Қирғизистон, Тожикистон, Туркманистон, Озарбайжон, Беларус, Туркия, Жанубий Корея ва бошқа мамлакатлар президентлари ҳам табрик йўлладилар.
Изоҳлар мавжуд емас