Ўзбекистон, Тошкент - Batafsil.uz. Бухоро вилоятида оилавий келишмовчилик сабаб келиб чиққан жанжал бир инсоннинг бутун умрга ногирон бўлиб қолишига, иккинчисининг эса узоқ муддатли қамоқ жазосига маҳкум этилишига сабаб бўлди.
Жиноят ишлари бўйича Қоракўл туман судида "Реги Ҳайдар" маҳалласида яшовчи 59 ёшли шахсга оид жиноят иши кўриб чиқилди. Судда аниқланишича, воқеа жабрланувчиси ўз қизининг яшаш хонадонига бориб, қудаси билан ёшларнинг оилавий муносабатлари ҳақида гаплашган вақтида юз берган. Жабрланувчи қизи Очилова чўри эмаслигини айтиб, оғзаки равишда улар билан тортишиб жанжал қилгани келган бўлган. Оддий суҳбат сифатида бошланган тортишув тез орада жисмоний зўравонликка айланиб, жиноятчи ўз қудасининг юз ва кўз қисмига мушт билан бир неча бор зарба берган.
Суд-тиббий экспертизасининг хулосасига кўра, жабрланувчининг ўнг кўз олмаси оғир даражада шикастланган ва тўр пардаси кўчган. Ушбу жароҳат натижасида фуқаро бир кўзининг кўриш қобилиятини бутунлай йўқотган. Мутахассислар буни умумий меҳнат қобилиятининг 33 фоиздан ортиғини йўқотишга олиб келувчи оғир тан жароҳати деб баҳолашган. Суд жараёнида айбланувчи ўз қилмишини тан олмай, қудасини урмаганини даъво қилган бўлса-да, гувоҳларнинг кўрсатмалари ва ашёвий далиллар унинг айбини тўлиқ исботлаган.
Шу сабабли судланувчининг ёши ва иккинчи гуруҳ ногиронлиги инобатга олинган ҳолда якуний ҳукм эълон қилинган.
Суд қарорига кўра, у Ўзбекистон Республикаси Жиноят кодексининг 104-моддаси 2-қисми "в" банди (Қасддан оғир тан жароҳати етказиш) билан айбдор деб топилган ва унга 5 йил-у 6 ой муддатга озодликдан маҳрум қилиш жазоси тайинланган.
Олдинроқ Сурхондарё вилояти Узун туманида куёв ва унинг қариндошлари қайнотани ваҳшийларча калтаклаб ўлдирганликда айблангани ҳақида маълум қилган эдик. Келиннинг қариндошлари ва куёв томон ўртасида келиб чиққан оммавий мушталашув натижасида яна бир киши оғир тан жароҳати билан шифохонага ётқизилган.
Изоҳлар мавжуд емас