Ўзбекистон, Тошкент - Batafsil.uz. Бухоро вилоятида ўз онасини пичоқлаб ўлдирган Осиё халқаро университети тиббиёт факультети талабасига нисбатан жиноят иши қўзғатилди. Аёл воқеа жойида вафот этганига қарамай, ҳуқуқ-тартибот идоралари ўғлининг ҳаракатларини оғир тан жароҳати етказиш моддаси билан малакалади.
Вазиятдан хабардор манбанинг маълум қилишича, воқеа турар-жой биносидаги можаро пайтида содир бўлган. Дастлабки маълумотларга кўра, жанжалга аёлнинг номаълум шахс билан телефон орқали сўзлашуви сабаб бўлган. Қилмиш содир этилгандан сўнг, гумонланувчи мустақил равишда ички ишлар органларига бориб, содир этган қилмишига иқрор бўлган.
Бош прокуратура матбуот котиби Ҳаёт Шамсутдинов мазкур ҳолат юзасидан Жиноят кодексининг 104-моддаси ("Қасддан баданга оғир шикаст етказиш") билан жиноят иши қўзғатилганини маълум қилди. Ҳозирда қўлга олинган шахсга нисбатан тергов ҳаракатлари олиб борилмоқда.
Batafsil.uz таҳририяти ушбу моддани танлаш сабабларига аниқлик киритиш учун тегишли идораларга сўров юборди. Хусусан, аёл олган тан жароҳатлари оқибатида воқеа жойида вафот этганлиги ҳақидаги маълумотни ҳисобга олган ҳолда, нима учун қилмиш 97-модда ("Қасддан одам ўлдириш") бўйича малакаланмаганлиги аниқланиши керак.
Изоҳлар мавжуд емас