Ўзбекистон, Тошкент - Batafsil.uz. Португалия терма жамоаси бугун, 23 июнь куни Жаҳон чемпионати гуруҳ босқичи доирасида Ўзбекистонга қарши майдонга тушади. Ушбу баҳс олдидан португалиялик таниқли агент Паулу Барбоза "Матч ТВ" телеканалига берган интервьюсида ўз терма жамоасининг имкониятлари ва Криштиану Роналдунинг ҳолати ҳақида танқидий фикр билдирди.
Барбозанинг таъкидлашича, Португалия учун бугунги учрашув жуда қийин кечади. У Ўзбекистон терма жамоасини юқори баҳолаб, уларнинг Колумбияга қарши ўйинида қайд этилган ҳисоб учрашув мазмунига мос келмаганини айтиб ўтди. Агентнинг фикрича, Ўзбекистон биринчи турда Португалия билан 1:1 ҳисобида дуранг ўйнаган ДР Конго терма жамоасидан анча кучлироқ ҳисобланади. Агар Португалия ўз ўйинини кучайтирмаса, мусобақа мезбонларидан бири бўлган АҚШни барвақт тарк этиши мумкин.
Шунингдек, Паулу Барбоза жамоа сардори Криштиану Роналдунинг жисмоний ҳолатидан қаттиқ хавотирда эканлигини яширмаган:
"Афсуски, Роналду бугун ўйинни асосий таркибда бошлайди. Ваҳоланки, унинг тайёр эмаслиги кўриниб турибди. У бундан олдинги учрашувларда ҳам етарлича спорт формасида эмас эди. Умуман олганда, ҳозир жамоамиздаги кўплаб футболчилар ўзларининг энг яхши жисмоний ҳолатида эмаслар", — дейди португалиялик агент.
Конгога қарши учрашувда 41 ёшли Криштиану Роналду майдонда тўлиқ 90 дақиқа ҳаракат қилган бўлса-да, самарали ҳаракатлари билан ажралиб тура олмаган эди. Бугунги ўйин Португалия учун гуруҳдан чиқиш масаласини ҳал қилувчи аҳамиятга эга эканлиги айтилмоқда.
Бундан олдин Ўзбекистон терма жамоаси бош мураббийи Фабио Каннаваро ва жамоа сардори Элдор Шомуродов бўлажак Португалия — Ўзбекистон баҳси олдидан ўз фикрлари билан ўртоқлашганди.
Изоҳлар мавжуд емас