Ўзбекистон, Тошкент - Batafsil.uz. Дубай - Тошкент рейси йўловчиси ёнида ўтирган аёлга нисбатан уятсиз хатти-ҳаракатлар содир этган. У тегажоғлик қилиб, ҳақоратли ва камситувчи сўзлар айтган, унинг оёқларига теккан ва бу ишни тўхтатиш ҳақидаги илтимосларни эътиборсиз қолдирган. Эркак пойтахтга етиб келгач, қўлга олинган ва жавобгарликка тортилган.
Batafsil.uz ихтиёрида нусхаси мавжуд бўлган Сергели туман суди қароридан маълум бўлишича, ҳуқуқбузар Фарғона вилоятида яшовчи 53 ёшли фуқаро экан. Парвоз пайтида "Мана бу жойга ўтир - кайф қиласан", "Дубайда нима қилдинг?", "Дубайда ҳамма қатори кўнгил очгани боргансан," "Дубайда бошқа эркаклар устига сакрайсан" каби беҳаё гапларни айтиб, йўловчининг шаъни ва қадр-қимматини ерга урган.
Судда у ўз айбига иқрор бўлди ва қилган ишидан пушаймон эканлигини айтиб, кечирим сўраган. Суд унинг ҳаракатларини жинсий тегажоғлик деб баҳолаб, беш сутка маъмурий қамоқ жазоси тайинлади. Бундан ташқари, эркакдан махсус ҳибсхонада сақланган ҳар бир кун учун базавий ҳисоблаш миқдорининг 15 фоизи ундирилади.
Изоҳлар мавжуд емас