Ўзбекистон, Тошкент - Batafsil.uz. Таиланддан Ўзбекистонга олиб кирилган 4,6 килограмм мефедрон синтетик гиёҳвандлик моддаси ва 635 грамм "Альфа-PVP" наркотиги мусодара қилинди. Ҳолат Давлат хавфсизлик хизмати ва "Тошкент-Аэро" ихтисослаштирилган божхона комплекси ходимларининг қўшма тезкор тадбири давомида аниқланган.
Маълум қилинишича, "Бангкок — Тошкент" йўналишида учиб келган 22 ва 33 ёшли икки нафар фуқаронинг юклари текширилганда, шиша ва алюминий идишларга яширилган 4,6 кг мефедрон топилган.
Уларнинг Тошкентдаги яшаш манзилларини кўздан кечириш жараёнида 1,5 литр гашиш мойи ва 8 литр эритувчи воситалар ҳам аниқланган.
Тезкор тадбир давомида хориждан келтирилган наркотикларни Тошкентда қабул қилиб олган 29 ёшли Жиззах вилоятида туғилган шахс ҳам ушланган. Ундан 635 грамм "Альфа-PVP" гиёҳвандлик моддаси олинган.
Ҳолат юзасидан Жиноят кодексининг 246-моддаси 2-қисми билан жиноят иши қўзғатилиб, тергов ҳаракатлари олиб борилмоқда. Мазкур жиноят учун амалдаги қонунчиликда 10 йилдан 20 йилгача озодликдан маҳрум қилиш жазоси белгиланган.
Бундан олдин ҳам Бангкокдан Тошкентга учиб келган Қозоғистон фуқаросининг юкидан 4,4 килограмм синтетик наркотик — мефедрон аниқланганди. Кейинчалик ушбу моддани қабул қилиб олишга келган маҳаллий фуқаро ҳам қўлга олинган эди.
Изоҳлар мавжуд емас