Ўзбекистон, Тошкент - Batafsil.uz. Фарғона шаҳридаги учта давлат мактабгача таълим ташкилотининг 62 нафар тарбияланувчиси "ўткир диарея" ташхиси билан шифохонага ётқизилган эди. Мазкур боғчаларга овқат етказиб берувчи Garden catering компанияси Коррупцияга қарши курашиш агентлиги томонидан аввалроқ тизимли қонунбузилишларда айбланган ва ҳокимликка тегишли тақдимнома киритилган бўлса-да, амалий чора кўрилмаган.
Бу ҳақида Batafsil.uz мухбирига агентлик матбуот котиби Шерзод Сапаров маълум қилди.
Аниқланишича, заҳарланиш ҳолати қайд этилган 2, 58 ва 61-сонли боғчаларга озиқ-овқат маҳсулотлари аутсорсинг асосида айнан Garden catering компанияси томонидан етказиб берилган. Коррупцияга қарши курашиш агентлиги 2024 йил июль ойида ўтказган ўрганишида Фарғона вилояти ҳокимининг қарори билан ушбу компания "Давлат харидлари тўғрисида"ги қонун ва Вазирлар Маҳкамасининг 626-сонли қарори талабларига зид равишда, тендерсиз, тўғридан-тўғри танлаб олинганини аниқлаган.
Белгиланган тартибга кўра, аутсорсер корхона умумий овқатланиш соҳасида камида бир йиллик тажрибага эга бўлиши шарт. Бироқ Garden catering trade компанияси шартнома имзоланишидан бор-йўғи бир ой олдин (2024 йил 21 июнь) рўйхатдан ўтган ва ҳеч қандай иш тажрибасига эга бўлмаган.
Агентлик томонидан вилоят ҳокимлигига қонунбузилишларни бартараф этиш ва айбдорларни жазолаш бўйича киритилган тақдимномага эса фақат "юзаки" жавоб хати юбориш билан чекланилган.
Ҳозирда мазкур ҳолат юзасидан Жиноят кодексининг 257-1-моддаси (Санитарияга оид қонунчиликни ёки эпидемияга қарши кураш қоидаларини бузиш) билан жиноят иши қўзғатилган ва тергов ҳаракатлари олиб борилмоқда.
Ушбу воқеа коррупцияга қарши курашиш нормаларига беписандлик ва назорат органлари кўрсатмаларини ижро этмаслик болалар соғлиғини хавф остида қолдиришини яққол кўрсатди.
Аввалроқ фарғоналик сенатор Гулнора Маъруфова ўз мурожаатида "боланинг бегонаси бўлмаслигини" таъкидлаб, воқеа вилоят раҳбарияти ва парламент юқори палатасининг шахсий назорати остида эканига ишонтиргани ҳақида маълум қилган эдик.
Изоҳлар мавжуд емас