Ўзбекистон, Тошкент - Batafsil.uz. Наманган вилоятида умумий қиймати 502,7 миллион сўмлик 32,6 минг ўрам дори воситалари ва тиббий буюмлар кейинчалик сотиш учун сақланаётган иккита омбор аниқланди.
Департаментнинг Мингбулоқ тумани бўлими ходимлари томонидан бошқа ҳуқуқни муҳофаза қилувчи органлар билан ҳамкорликда тезкор тадбир ўтказилди. Маълум қилинишича, муқаддам судланган шахс ва унинг шериклари "Бобуршоҳ" ва "Порлоқ" маҳаллаларида омборхоналар ташкил қилган.
Ҳуқуқ-тартибот идоралари ходимлари томонидан жами 485 номдаги маҳсулот топилган. Дори-дармон ва тиббий буюмларнинг бир қисми давлат реестридан ўтказилмаган ва мувофиқлик сертификатига эга бўлмаган, айримларининг яроқлилик муддати тугаган. Бутун партия ашёвий далил сифатида олинган.
Ҳолат юзасидан Жиноят кодексининг 276-моддаси ("Сифатсиз ёки қалбакилаштирилган дори воситалари ва тиббий буюмларни сотиш мақсадида сақлаш, ташиш ва ўтказиш, шунингдек дорихоналардан ташқарида сотиш") билан жиноят иши қўзғатилган. Тергов ҳаракатлари олиб борилмоқда.
Эслатиб ўтамизки, аввалроқ Наманганда умумий қиймати 577,4 миллион сўмлик 56 номдаги 13,2 минг қадоқ дори-дармонлар сақланган яна бир омбор борлиги маълум қилинганди.
Изоҳлар мавжуд емас