Ўзбекистон, Тошкент - Batafsil.uz. Наманган вилоятида 13 ёшли боланинг юқори кучланишли ток уриши оқибатида фожиали тарзда ҳалок бўлиши сабабли Болалар омбудсмани расмий баёнот билан чиқди. Ҳуқуқ ҳимоячиси юзага келган фожиа муносабати билан республиканинг барча ҳудудларидаги электр қурилмалари ва трансформатор нимстанцияларининг хавфсизлиги устидан назоратни зудлик билан кучайтиришни талаб қилди.
Аввалроқ вояга етмаган бола атрофда ўсиб турган гилосни териш мақсадида юқори кучланишли трансформатор устига чиққани, шу лаҳзада ўсмир кучли электр токи уриши натижасида оғир тан жароҳатлари олиб, шифохонада вафот этгани ҳақида хабар
берган эдик.
Ҳалок бўлган боланинг яқинлари мазкур объект бошланғич хавфсизлик талабларига умуман жавоб бермаганини даъво қилишмоқда. Уларнинг сўзларига кўра, хавфли қурилма атрофи ҳеч қандай тўсиқ ёки панжара билан ўралмаган, юқори кучланишли симларнинг бир қисми эса тегишли изоляциясиз, очиқ ҳолда қолдирилган.
Болалар омбудсмани ўз баёнотида
бу каби юқори хавф туғдирувчи объектлар назоратсиз ва болалар осонликча кира оладиган даражада очиқ қолдирилиши мумкин эмаслигини қатъий таъкидлаган. Ҳозирда мазкур бахтсиз ҳодиса юзасидан прокуратура органлари томонидан синчковлик билан текширув ҳаракатлари олиб борилмоқда.
Сурриштирув давомида ҳудуддаги хавфсизликка масъул бўлган энергетика хизматлари ходимларининг хатти-ҳаракатларига ҳуқуқий баҳо берилади.
Изоҳлар мавжуд емас