Ўзбекистон, Тошкент – Batafsil.uz. Қурол ишлатиш орқали маст ҳайдовчи бошқарувида бўлган “Малибу”нинг тўхтатилгани ижтимоий тармоқларда шов-шув чиқарди. Одам қай даражада маст бўлиши керакки, Америка киноларидагидек ҳуқуқни муҳофаза қилиш идоралари ходимларини босиб ўтишга ҳаракат қилинса? Бу ҳақда мухбиримиз хабар бермоқда.
Кеча UzReportTV телеканали орқали мазкур воқеа айбдори билан олинган интерью намойиш қилинганидан сўнг, масала ойдинлашди. Унинг айтишича, ҳодисадан олдин у Белдерсойда тўрт кун “дам олиб”, ароқ ва пивони қўшиб истеъмол қилган. “Қахрамон”нинг қўшимча қилишича, у шу даражада маст ҳолда автомобилни бошқарганки, ҳеч нарсани назорат қила олмаган ва англамаган.
Тергов давомида аниқланишича, ҳайдовчи аввал йўл ҳаракати қоидабузарликлари учун икки марта жиноий жавобгарликка тортилган. Биргина 2021 йилнинг ўзида унга бир неча маротаба жарима солинган бўлиб, жарималарнинг умумий миқдори 7 миллион сўмдан ошган.
Юнусобод туман прокуратураси томонидан ушланган шахсга нисбатан Жиноят кодексининг 219-моддаси (ҳокимият вакили ёки фуқаролик бурчини бажарувчи шахсга қаршилик кўрсатиш) бўйича жиноят иши очилган, тергов ишлари олиб борилмоқда.
Ушбу модда бўйича базавий ҳисоблаш миқдорининг эллик бараваридан юз бараваригача (13,5 миллион сўмдан 27 миллион сўмгача) жарима ёки уч юз олтмиш соатгача мажбурий жамоа ишлари, уч йилгача ахлоқ тузатиш ишлари ёки бир йилдан уч йилгача озодликни чеклаш ёки бир йилдан уч йилгача озодликдан маҳрум қилиш кўзда тутилган.
Изоҳлар мавжуд емас