Ўзбекистон, Тошкент - Batafsil.uz. Бангкокдан Тошкентга учиб келган Қозоғистон фуқаросининг юкидан 4,4 килограмм синтетик наркотик — мефедрон аниқланди. Кейинчалик ушбу моддани қабул қилиб олишга келган маҳаллий фуқаро ҳам қўлга олинди.
Давлат хавфсизлик хизмати маълум қилишича, ушбу тезкор тадбир доирасида "Тошкент-Аэро" ихтисослаштирилган божхона комплекси ходимлари билан ҳамкорликда ўтказилган.
Тезкор тадбир давомида "Бангкок – Шаржа – Тошкент" йўналиши орқали мамлакатга келган 32 ёшли Қозоғистон фуқаросининг қўл юки текширилганда, турли хил ширинликлар қадоқлари ва пластмасса идишлар ичига яширилган жами 4,4 килограмм мефедрон борлиги аниқланган.
Шундан сўнг операция давом эттирилиб, интернетдаги наркодўкон бошқарувчисининг топшириғи билан гиёҳванд моддани қабул қилиб олиш учун пойтахтдаги меҳмонхоналардан бирига келган, Янгийўл шаҳрида яшовчи 20 ёшли шахс ҳам ушланган. Уни текшириш жараёнида пневматик пистолет ҳам аниқланиб, процессуал тартибда расмийлаштириб олинган.
Ҳолат юзасидан Жиноят кодексининг 246-моддаси 2-қисми билан жиноят иши қўзғатилган. Ҳар икки гумонланувчига нисбатан қамоқ эҳтиёт чораси қўлланилган бўлиб, тергов ҳаракатлари давом этмоқда.
Олдинроқ Давлат хавфсизлик хизмати ҳамда Ички ишлар органлари томонидан Сурхондарё ва Жиззах вилоятларида ўтказилган тезкор тадбирларда қарийб 9 килограмм гиёҳвандлик воситаларининг ноқонуний айланмасига чек қўйилганди.
Изоҳлар мавжуд емас