Ўзбекистон, Тошкент - Batafsil.uz. АҚШнинг Эрон ҳудудидаги Ларк оролига берган зарбасидан сўнг Теҳрон минтақадаги Америка ҳарбий объектларига қарши жавоб ҳужумларини бошлади. Иордания АҚШ ҳарбий базаларига учирилган саккизта ракетани тутиб қолганини маълум қилди, БАА эса Эрон томонидан учирилган дронни ҳудудий сувлари устидан уриб туширганини билдирди.
30 август куни АҚШ ҳарбийлари Ҳурмуз бўғозидаги Эроннинг Ларк оролида жойлашган иккита ракета қурилмасига зарба берди. АҚШ Марказий қўмондонлиги (CENTCOM) операцияни "чекланган ва аниқ" зарба сифатида баҳолаб, нишонлар Ислом инқилоби қўриқчилари корпусига (ИИҚК) тегишли бўлганини билдирди. Вашингтон маълум қилишича, Эрон ҳарбийлари Ҳурмуз бўғозига денгиз миналарини жойлаштириш учун ракета қурилмаларидан фойдаланишга тайёрланган.
Эроннинг Tasnim агентлиги маълумотларига кўра, АҚШ зарбаси оқибатида икки киши ҳалок бўлган, яна икки киши яраланган. Ислом инқилоби қўриқчилари корпуси ҳам зарба оқибатида ҳарбийлар ва тинч аҳоли орасида қурбонлар ва ярадорлар борлигини билдирди.
Кўп ўтмай, ИИҚК Иорданиядаги АҚШ ҳарбий объектлари — "Қирол Ҳусайн" ва "Ал-Азрақ" авиабазаларига баллистик ракеталар билан зарба берилганини маълум қилди. Иордания ҳарбийлари саккизта ракетани ҳавода тутиб қолганини билдирди.
Шунингдек, ИИҚК АҚШнинг MQ-9 Reaper разведка-зарба дрони Ҳурмуз бўғози устидан уриб туширилганини маълум қилди. Бундай дронларнинг биттаси тахминан 30–50 миллион доллар туради. Уруш даврида АҚШ камида 45 та MQ-9 Reaper дронини йўқотган бўлиб, уларнинг умумий қиймати 1,3 миллиард доллардан ошиши мумкин. Бу рақам АҚШнинг уруш давридаги барча MQ-9 йўқотишларини қамраб олади ва айнан сўнггида уриб туширилган дронга тегишли эмас.
Воқеалар БАА ҳудудига ҳам таъсир кўрсатди. БАА Мудофаа вазирлиги 31 август куни мамлакат ҳаво кучлари Эрон томонидан учирилган дронни ҳудудий сувлар устидан тутиб қолганини маълум қилди. Теҳрон ҳозирча ушбу ҳодиса учун жавобгарликни расман ўз зиммасига олмаган.
АҚШ президенти Дональд Трамп эса Эрон аввалроқ нисбатан бетараф позицияда бўлган Саудия Арабистони, Қатар, БАА, Баҳрайн ва Қувайтга ҳужум қилганини таъкидлади. Унинг сўзларига кўра, бу Теҳроннинг минтақадаги қўллаб-қувватловини камайтирган.
Изоҳлар мавжуд емас