Ўзбекистон, Тошкент - Batafsil.uz. Ички ишлар вазирлиги, Давлат хавфсизлик хизмати ва Божхона қўмитаси ҳамкорлигида ўтказилган кенг кўламли тезкор тадбирлар натижасида гиёҳвандлик воситаларининг катта партияси мамлакатимизга ноқонуний олиб кирилишига чек қўйилди.
Тезкор тадбирлар Тошкент ва Наманган вилоятларида амалга оширилган. Жумладан, Тошкент вилоятининг Қибрай туманида икки нафар фуқаро дала майдонига кўмиб кетилган 21,5 килограмм гашиш, опий ва метамфетамин моддаларини олаётган вақтида ашёвий далиллар билан ушланган. Тергов жараёнида улар мазкур жиноий уюшманинг Ўзбекистондаги етакчиларидан бири, 54 ёшли шахснинг кўрсатмаси билан ишлагани маълум бўлган.
Аниқланишича, ушбу шахс қўшни давлатда яшовчи фуқаро билан тил бириктириб, трансмиллий жиноий уюшма тузган ва мамлакатимизга тизимли равишда гиёҳванд моддалар етказиб бериш билан шуғулланиб келган. Гуруҳнинг қолган аъзоларини фош этиш мақсадида Наманган вилоятида ўтказилган амалиёт чоғида эса муқаддам судланган 63 ёшли фуқаро яна 5 килограмм гашишни олаётган пайтда қўлга олинган.
Ҳозирда мазкур ҳолат юзасидан жиноий гуруҳ аъзоларига нисбатан Жиноят кодексининг 273-моддаси 5-қисми билан жиноий иш қўзғатилиб, тергов ҳаракатлари олиб борилмоқда.
Изоҳлар мавжуд емас