Ўзбекистон, Тошкент - Batafsil.uz. АҚШ Молия вазирлиги мамлакат мустақиллигининг 250 йиллиги муносабати билан президент Дональд Трампнинг тасвири туширилган янги 250 долларлик банкноталарни чиқариш ғоясини кўриб чиқмоқда. Бу ҳақда The Washington Post нашри ўз манбаларига таяниб хабар берди.
Лойиҳага кўра, янги номиналдаги банкнотанинг марказида Дональд Трампнинг портрети, шунингдек, президент ва молия вазири Скётт Бессентнинг имзолари бўлиши кўзда тутилган. Агар бу ташаббус амалга ошса, АҚШ тарихида биринчи марта амалдаги президентнинг тасвири ва имзоси миллий валютада акс эттирилган бўлади.
Ҳозирда АҚШ қонунчилигига кўра, муомаладаги пул бирликларига фақат вафот этган шахсларнинг тасвирини туширишга рухсат берилади. Шу сабабли, ушбу лойиҳани рўёбга чиқариш учун АҚШ Конгресси махсус қонун лойиҳасини қабул қилиши талаб этилади.
Босма ва ўйма ишлари бюроси ходимлари бундай банкнотани яратиш техник ва ҳуқуқий жиҳатдан мураккаб жараён эканини таъкидламоқда. Шунга қарамай, маъмурият вакиллари дизайн намуналарини тайёрлаб, жараённи тезлаштиришга ҳаракат қилмоқда.
Изоҳлар мавжуд емас