Ўзбекистон, Тошкент - Batafsil.uz. Фарғона вилояти божхона бошқармаси ходимлари томонидан мамлакат ҳудудига гиёҳвандлик моддаси бўлган дори воситаларини ноқонуний олиб киришга уринишнинг олди олинди. Дори солинган флаконлар болалар колготкасида яширилган эди.
Ҳодиса "Риштон" чегара божхона постида содир бўлган. Қўшни давлатдан келган фуқаронинг хатти-ҳаракати божхона ходимларида шубҳа уйғотиб, у шахсий кўрикдан ўтказилди.
Текширув давомида маълум бўлишича, аёл маҳсулотни болалар колготкаси ичига яширган. Гап Tawon Liar дори воситасининг 23 қадоғи, яъни декларациясиз ва зарур ҳужжатларсиз жами 950 га яқин таблетка ҳақида кетмоқда.
Экспертиза натижасида препарат таркибида гиёҳвандлик воситалари рўйхатига киритилган Тапентадол моддаси борлиги аниқланди. Ушбу наркотик анальгетикни ҳатто 0,5 грамм миқдорда сақлаш ва тарқатиш учун жиноий жавобгарлик белгиланган.
Мазкур ҳолат юзасидан жиноят иши қўзғатилган. Тергов ҳаракатлари олиб борилмоқда.
Бу Tawon Liar дори воситасини олиб киришга биринчи уриниш эмас. Аввалроқ Фарғона божхона бошқармаси ходимлари оддий посилка сифатида олиб ўтишга уринган 6 мингдан ортиқ таблеткани аниқлаган эди.
Изоҳлар мавжуд емас