Ўзбекистон, Тошкент - Batafsil.uz. Мухлислар Халқаро футбол федерациясини (FIFA) Аргентина терма жамоасига ён босишда айблаб, жамоани Жаҳон чемпионатидан четлатишни талаб қилувчи петицияни имзолашди.
Мурожаат argentinaout.com сайтида жойлаштирилган бўлиб, унга ҳозирга қадар 5 миллиондан ортиқ киши овоз берган. Бироқ ушбу ташаббус шунчаки ишқибозлар норозилиги ифодаси бўлиб, турнир натижаларига ёки ўйинлар тақвимига ҳеч қандай таъсир кўрсатмайди.
Норозиликларга Аргентина иштирокидаги учрашувларда ҳакамлар ва VAR тизими томонидан қабул қилинган баҳсли қарорлар сабаб бўлган. Хусусан, чорак финалдаги Швейцарияга қарши ўйинда рақиб ҳужумчиси Брел Эмболо VAR текширувидан сўнг иккинчи сариқ карточка билан майдондан четлатилган.
Шунингдек, 1/8 финалдаги Аргентина — Миср учрашувида ҳам мисрликларнинг голи айнан видеотакрор тизими ёрдамида бекор қилинган эди.
Петиция муаллифларининг даъво қилишича, ташкилотчилар ва ҳакамлар Лионел Месси ҳамда Аргентина терма жамоасига нисбатан очиқчасига холисликни йўқотган ва агар ғолиб олдиндан маълум бўлса, бошқа жамоаларнинг иштироки мазмунсиз бўлиб қолмоқда.
Маълумот учун, Аргентина терма жамоаси ярим финал босқичи доирасида 15 июл куни Атланта шаҳрида Англия терма жамоасига қарши майдонга тушади.
Эслатиб ўтамиз, амалдаги жаҳон чемпиони Аргентина терма жамоаси Жаҳон чемпионати 1/8 финал босқичида Мисрни 3:2 ҳисобида мағлуб этиб, мусобақанинг чорак финалига йўл олганди. Бешта гол урилган ва кескин курашларга бой кечган учрашувда ғолиб номи фақат қўшимча вақтда аниқланган эди. Бироқ учрашувдан кейин асосий муҳокамалар ғолиб жамоа ёки ўйин сифати эмас, балки ҳакамлар бригадаси ва VAR томонидан қабул қилинган қарорлар атрофида кечмоқда.
Изоҳлар мавжуд емас