Ўзбекистон, Тошкент - Batafsil.uz. Футбол бўйича жаҳон чемпионатининг 2-туридан ўрин олган Португалия — Ўзбекистон учрашуви олдидан расмий матбуот анжумани ўтказилди. Унда миллий терма жамоамиз бош мураббийи Фабио Каннаваро ва жамоа сардори Элдор Шомуродов бўлажак баҳс олдидан ўз фикрлари билан ўртоқлашди.
Матубот анжуманида дастлаб сўз олган Элдор Шомуродов жамоада ҳеч қандай руҳий босим йўқлигини, шу сабабли Португалияга қараганда Ўзбекистон вакилларига майдонда осонроқ бўлишини таъкидлаган. Унинг сўзларига кўра, таркибда ажойиб муҳит ва кучли ишонч шаклланган бўлиб, терма жамоа дебют ўйинидан кейин мослашиб улгурган ва эртанги баҳсга фақат ижобий натижа учун чиқади:
"Бизда босим йўқ. Шу сабабли эртага Португалияга қараганда бизга осонроқ бўлади, деб ўйлайман. Бизда ажойиб жамоа шаклланган. Биринчи ўйиндан кейин бизда ишонч кучли, биз аллақачон дебют қилиб бўлдик. Биз эртага яхши натижа учун майдонга чиқамиз. Биз рақибимизнинг биринчи турдаги ўйинининг натижасига аҳамият бермадик. Бу ҳақида ҳозир ўйлашнинг пайти эмас. Балки учинчи турдан кейин буни муҳокама қилармиз, ҳозир биз учун энг асосийси эртанги баҳс" - деган терма жамоамиз сардори.
Сардор Колумбия билан ўйиндаги хатолар мураббий кўрсатмаларини тўлиқ бажара олмаслик оқибатида келиб чиққанини тан олган ва бўлажак учрашувда бу камчиликларни такрорламасдан, тўп назоратини қўлга олишга ҳаракат қилишларини билдирган. Рақиб жамоанинг биринчи турдаги натижаларига чалғимаслик лозимлигини айтган Шомуродов, жамоадоши Аббос Файзуллаев билан бир клубда тўп суриши ва машғулотларда доимо бирга бўлиши уларнинг майдонда бир-бирини яхши тушунишига ёрдам беришини қўшимча қилган .
Бош мураббий Фабио Каннаваро эса Португалиянинг футбол фалсафасини, айниқса, уларнинг тўп назорати ва ўйинни жуда фаол бошлаш услубини синчиклаб ўрганишганини маълум қилган. Рақибнинг кучига қарамай, жамоа улардан қўрқмаслигини, уучрашув якунигача курашиш учун ўз стратегияси ва режасига эга эканлигини таъкидлаган.
Мураббий Португалия фақатгина Криштиану Роналдудан иборат эмаслигини, уларнинг асосий ва захира таркибида юқори савияли ижрочилар кўплигини эслатиб ўтган. Бироқ Роналдуни жарима майдончасида бир сонияга ҳам эътиборсиз қолдириб бўлмаслигини, чунки у исталган вақтда гол уришга қодирлигини алоҳида қайд этган.
Хусусан, кеча Фабио Каннаваро Роналдунинг мақоми старт ҳуштагидан кейин унутилишини айтган эди. Каннаваро жамоанинг жисмоний ҳолати яхши эканини ва футболчилар ўйин давомида тартибсиз югурмасдан, тўпни йўқотмаслик ҳамда уни тўғри жойда қайтариб олиш учун ақлли ҳаракат қилишлари кераклигини уқтирган.
Изоҳлар мавжуд емас