Ўзбекистон, Тошкент - Batafsil.uz. АҚШ Олий суди президент Доналд Трампнинг мамлакатда қонуний ёки доимий мақомга эга бўлмаган ота-онадан туғилган болаларга автоматик равишда Америка фуқаролигини беришни чекловчи фармонини Конституцияга зид деб топди.
Қарор 30 июнь куни эълон қилинди. Суд Қўшма Штатларда ноқонуний ёки вақтинча бўлган ота-оналардан туғилган болалар Қўшма Штатлар юрисдикциясига бўйсунишини ва Конституциянинг 14-тузатишига мувофиқ туғилганда фуқаролик олишини тасдиқлади.
Трампнинг фармони 2025 йил 20 январда, унинг иккинчи президентлик муддатининг биринчи кунида имзоланган. Ҳужжатда ота-онаси АҚШда ноқонуний ёки вақтинча бўлиб турган ва доимий яшаш учун рухсатномага эга бўлмаган болаларга туғилганлик бўйича фуқаролик ҳуқуқи татбиқ этилмаслиги кераклиги назарда тутилган.
Бир қатор штатлар ҳукумати, шунингдек, ҳуқуқ ҳимоячилари ва янги қоида таъсир қилиши мумкин бўлган оилалар фармонга қарши чиқди. Қуйи суд аввалроқ ҳужжатнинг амал қилишини тўхтатиб қўйган, шундан сўнг иш Олий судга қадар етиб борган.
Қарорни олтита судья ёқлаб, учтаси қарши чиқди. Кўпчилик 14-тузатишга ишора қилди, унга кўра, мамлакат ҳудудида туғилган ва унинг юрисдикцияси остида бўлган барча шахслар АҚШ фуқаролари ҳисобланади.
Алоҳида фикр билдирган судья Кларенс Томас суд кўпчилигининг меъёрни талқин қилишига қўшилмаслигини айтди.
Суд жараёни шу билан эсда қолдики, 1 апрель куни Доналд Трамп АҚШ тарихида Олий суддаги оғзаки эшитувларда шахсан иштирок этган биринчи амалдаги президент бўлди.
Изоҳлар мавжуд емас