Францияда ўқувчилар норозилик билдиришмоқда. Юзлаб мактаблар ёпилди, 5 мингдан ортиқ киши ҳибсга олинди

Ўзбекистон, Тошкент - Batafsil.uz.   Францияда мактаб ўқувчиларининг таълим тизимидаги муаммоларга қарши норозиликлари уч ҳафтадан бери давом этмоқда. Мамлакат бўйлаб юзлаб мактаблар фаолияти тўлиқ ёки қисман тўхтатилган, намойишлар эса айрим шаҳарларда полиция билан тўқнашувларга айланган.

Норозиликлар сентябрь ойи ўрталарда Париж яқинидаги Кретей шаҳрида бошланган. Ўқувчилар ўқитувчилар етишмаслиги, синфларда ўқувчилар сонининг кўплиги, мактаб биноларининг эскиргани ва дарс жадвалларининг ҳаддан ташқари оғирлигидан норози.

Кейинчалик ҳаракат мамлакатнинг бошқа ҳудудларига ҳам тарқалган. Ўқувчилар мактабларга кириш жойларини тўсиб қўйган, айрим жойларда чиқиндилар ёқилган ва полиция билан тўқнашувлар содир бўлган.

Франция Таълим вазири Эдуар Жеффре маълум қилишича, 5 октябрь куни мамлакатдаги 3,7 минг мактабдан 400–500 таси хавфсизлик сабабли тўлиқ ёки қисман ёпилиши кутилган. Норозиликлар бошланганидан бери 24 та мактабда ёнғин чиқарилган ёки вайронгарчилик содир этилган, 78 нафар таълим ходими жароҳатланган.

Reuters маълумотларига кўра, 28 сентябрдан буён 5 мингдан ортиқ намойишчи ҳибсга олинган. Уларнинг аксарияти вояга етмаганлар бўлиб, 1,8 мингга яқин киши жавобгарликка тортилиши мумкин.

Норозиликлар пайтида ўқувчилар ва полиция ходимлари ҳам жароҳат олган. Lens шаҳрида 15 ёшли ўсмир полиция томонидан қўлланган шовқинли гранатани олганидан кейин қўлининг бир қисми узилиб кетган. Ҳодиса юзасидан расмий текширув бошланган.

Ҳукумат таълим соҳасидаги муаммоларни ҳал қилиш учун чора-тадбирлар режасини ишлаб чиқишини билдирган. Бош вазир Себастьен Лекорню эса вазият сабабли инқироз бўйича йиғилиш ўтказган.

Айни пайтда норозиликлар сиёсий тус ҳам олмоқда. Ҳукумат сўл сиёсий кучларни намойишларни кучайтиришда айбламоқда, улар эса бу даъвони рад этмоқда. Намойишлар Францияда 2027 йилда бўлиб ўтадиган президентлик сайловлари арафасида ҳукуматга қўшимча босим бўлмоқда.

Ўқувчилар уюшмалари 6 октябрь куни мамлакат бўйлаб янги намойишлар ўтказишга чақирган. Шу сабабли француз расмийлари вазият яна кескинлашишидан хавотирда.