Ўзбекистон, Тошкент - Batafsil.uz. Қирғизистон Миллий хавфсизлик давлат қўмитасининг собиқ раҳбари Қамчибек Ташиев ва яна бир қатор собиқ юқори лавозимли амалдорлар "75 мактуб" иши доирасида Ички ишлар вазирлигида сўроқдан ўтказилди. Адвокат Шердор Абдикафаровнинг маълум қилишича, Ташиев билан бирга собиқ депутат Курманкул Зулушев ва парламентнинг собиқ спикери Нурланбек Тургунбек уулу (Шакиев) ҳам тергов идорасига чақиртирилган.
Сўроқ жараёни ИИВ Бош тергов бошқармасида бир неча соат давом этган бўлиб, унда собиқ амалдорларга оммавий тартибсизликлар ташкил этиш ва давлат тўнтаришига уриниш айбловлари доирасида саволлар берилган. Мазкур шов-шувли жиноят иши 2026 йил февраль ойида 75 нафар шахс томонидан президент Садир Жапаровга йўлланган, муддатидан олдин президент сайловларини ўтказиш таклиф этилган мурожаатдан сўнг бошланган.
Мурожаатдан сўнг Қамчибек Ташиев Миллий хавфсизлик давлат қўмитаси раҳбари раҳбарлигидан озод этилган ва қўмита қайта ташкил қилинган. Парламент амалдорлари Нурланбек Тургунбек уулу ва депутат Курманкул Зулушев ўз ваколатларини муддатидан олдин топширган.
Мактубни имзолаган айрим шахслар оммавий тартибсизликлар ташкил этиш айблови билан ҳибсга олинган.
Садир Жапаров Ташиевни қайта давлат лавозимига тайинлаш режаси йўқлигини билдирган, Конституциявий суд эса сайловлар ўз вақтида — 2027 йилда ўтказилишини тасдиқлаган.
Олдинроқ Қамчибек Ташиевнинг укаси, собиқ депутат Шаирбек Ташиев ҳам коррупцияга оид жиноят иши доирасида қўлга олинганди.
Изоҳлар мавжуд емас