Ўзбекистон, Тошкент - Batafsil.uz. Бугун, 9 январь куни, тунда Россия армияси Украина бўйлаб кенг кўламли ҳаво ҳужумини амалга оширди. Натижада Киевда турар-жой бинолари ва муҳим инфратузилма объектлари зарар кўрди, тинч аҳоли орасида қурбонлар ва яраланганлар бор.
Киев шаҳри мери Виталий Кличконинг маълум қилишича, ҳужум оқибатида камида 4 киши ҳалок бўлган, 10 дан ортиқ инсон жароҳатланган. Ҳужум ярим тунда дронлар рейди билан бошланган ва кейинчалик ракета зарбалари билан давом этган.
Шаҳарнинг бир нечта туманларида электр ва сув таъминотида узилишлар кузатилмоқда.
Украина Қуролли кучлари Ҳарбий-ҳаво кучларининг маълумотига кўра, мамлакат ғарбидаги Львов вилоятига отилган ракеталардан бири соатига тахминан 13 000 километр тезликда ҳаракатланган.
Бундай юқори тезликка эга бўлган ракета Россиянинг энг янги "Орешник" гипертовшули тизими бўлиши мумкин.
Ракетанинг тури унинг парчалари тўлиқ ўрганиб чиқилгандан сўнг расман тасдиқланади. Ушбу ҳужумлар Россия ва Ғарб ўртасидаги муносабатлар энг юқори нуқтага чиққан пайтда содир бўлди.
Москва Украинага юборилиши мумкин бўлган ҳар қандай хорижий ҳарбий бўлинмаларни "қонуний нишон" деб эълон қилган.
Бир кун аввал АҚШ кучлари Атлантика океанида Россия байроғи остидаги нефть танкерини қўлга олгани вазиятни янада оғирлаштирган.
Ҳозирда қутқарув ишлари давом этмоқда, Украина расмийлари халқаро ҳамжамиятни ҳаво ҳужумидан мудофаа тизимларини кучайтиришда ёрдам беришга чақирмоқда.
Эслатиб ўтамиз, Россия Ташқи ишлар вазири Сергей Лавров 29 декабрга ўтар кечаси Украина дронлари Новгород вилоятидаги Валдай президент қароргоҳига ҳужум қилишга уринганини маълум қилганди. Бу баёнот Киев ва Вашингтон ўртасида урушни тугатиш бўйича музокаралар фаоллашган бир пайтда янграган эди.
Изоҳлар мавжуд емас