Ўзбекистон, Тошкент - Batafsil.uz. Хитой пойтахти Пекин шаҳрида Хитой раиси Си Цзиньпин ва Россия президенти Владимир Путин ўртасида юқори даражадаги музокаралар бўлиб ўтди. Учрашув икки давлат ўртасидаги сиёсий ва иқтисодий ҳамкорликни янада кенгайтириш масалаларига бағишланди.
Расмий маълумотларга кўра, Си Цзиньпин Путинни Буюк халқлар саройи олдида расман кутиб олган. Томонлар қўл бериб кўришганидан сўнг, ҳарбий оркестр иштирокида икки давлат мадҳиялари янграган ва делегациялар музокаралар залига йўл олган.
Музокаралар давомида Путин Россия ва Хитой ўртасидаги ҳамкорлик "ижобий динамика" билан ривожланаётганини таъкидлаган. Унинг сўзларига кўра, ташқи қийинчиликларга қарамасдан иқтисодий алоқалар барқарор ўсишда давом этмоқда.
Си Цзиньпин эса икки давлат ўртасидаги сиёсий ишонч ва стратегик ҳамкорлик "синовларга қарамай мустаҳкамлигича қолаётганини" қайд этган. Шу билан бирга, у халқаро вазиятга тўхталиб, зиддиятларнинг давом этиши мақбул эмаслиги ва ўт очишни тўхтатиш зарурлигини таъкидлаган.
Учрашув АҚШ президенти Дональд Трампнинг Хитойга ташрифидан бир неча кун кейин бўлиб ўтди. Шу билан бирга, Хитой раҳбари Яқин Шарқдаги вазият юзасидан ҳам фикр билдириб, можароларни кенгайтириш эмас, балки тинчлик музокараларини давом эттириш муҳимлигини айтган.
Маълумотларга кўра, Россия делегацияси таркибида АҚШ делегацияси каби йирик бизнес ва давлат вакиллари ҳам иштирок этмоқда. Томонлар иқтисодиёт, туризм ва таълим соҳалари бўйича қирққа яқин битим имзолашни режалаштирмоқда.
Шу билан бирга, энергетика соҳасидаги ҳамкорлик асосий мавзулардан бири сифатида кўрилмоқда. Айниқса, Россиянинг Европа бозорига газ етказиб бериш қисқаргани шароитида Хитой билан энергетик алоқаларни кенгайтириш масаласи муҳокама қилингани қайд этилмоқда.
14 май куни АҚШ Президенти Дональд Трамп ҳам Пекинда Хитой халқ республикаси Раиси Си Цзиньпин билан музокараларни ўтқазганди. Унда ҳам асосий эътибор иқтисодий алоқалар ва технологиялар соҳасидаги ҳамкорликка қаратилган эди.
Изоҳлар мавжуд емас