Ўзбекистон, Тошкент - Batafsil.uz. Россия ҳукумати комиссияси миграция соҳасидаги давлат божларини сезиларли даражада оширишни кўзда тутувчи қонун лойиҳасини маъқуллади. Молия вазирлиги томонидан илгари сурилган ушбу ташаббус доирасида айрим хизматлар учун тўловлар 12 бараваргача кўтарилиши белгиланган.
Янги тартибга кўра, Россия фуқаролигини олиш ёки ундан чиқиш учун бож миқдори амалдаги 4 200 рублдан 50 000 рублгача ошиши прогноз қилинмоқда.
Қонун лойиҳасида кириш визаларидан тортиб, яшаш ҳуқуқини берувчи ҳужжатларгача бўлган тўловларни қайта кўриб чиқиш таклиф этилган. Хусусан, мамлакатга кириш учун таклифнома расмийлаштириш божи 960 рублдан 8 000 рублга, вақтинча яшаш учун рухсатнома (РВП) эса 1 920 рублдан 15 000 рубльга кўтарилиши мумкин. Шунингдек, яшаш гувоҳномасини (ВНЖ) олиш тўлови 30 000 рубль, кўп марталик визалар эса 6 000 рубль этиб белгиланиши кутилмоқда. Иш берувчилар учун хорижий ишчиларни жалб қилиш рухсатномаси эса 15 000 рублгача қимматлаши кўзда тутилган.
Шу билан бирга, ҳужжатларни йўқотганлик ёки яроқсиз ҳолга келтирганлик учун 5 000 рубль миқдорида жарима жорий этилиши мумкин. Имтиёзлар бўлимида эса собиқ Иттифоқ фуқароси бўлган шахслар, ватандошларни кўчириш дастури иштирокчилари ҳамда Россия Қуролли кучлари билан шартнома тузган ҳарбийлар учун бож тўламаслик тартиби сақлаб қолинган.
Ҳукумат ушбу ўзгаришлар орқали 2027 йилдан бошлаб бюджетга йилига қўшимча 15,8 миллиард рубль даромад келтиришни режалаштирмоқда.
Аввалроқ Россия ҳукумати МДҲнинг визасиз мамлакатларидан бўлган меҳнат мигрантлари учун қоидаларни кучайтиришга тайёрланаётган эди. Молия вазирлиги лойиҳасига кўра, 2027 йилдан бошлаб мигрантлар нафақат ўзлари учун, балки вояга етмаган фарзандлари ва бошқа қарамоғидагилар учун ҳам патент тўловини ўз тўловининг 50 фоизи миқдорида тўлашга мажбур бўлади. 18 ёшга тўлгандан сўнг, болалар шахсий патент олишлари ёки яшаш учун бошқа қонуний асослар бўлмаса, мамлакатни тарк этишлари керак бўлади.
Изоҳлар мавжуд емас