Ўзбекистон, Тошкент - Batafsil.uz. Қозоғистоннинг Қарағанди шаҳридан Тошкентга халқаро Dostlik Cup 2026 футбол фестивалида иштирок этиш учун келган болалар ва катталар заҳарланиш аломатлари билан шифохонага мурожаат қилгани ҳақида хабар берган эдик. Расмий маълумотда айтилишича, жами 19 киши тиббий ёрдам сўраган, улардан 17 нафари, жумладан, 11 нафар бола ва олти нафар катта ёшли бемор касалхонага ётқизилган.
Қозоғистоннинг Ўзбекистондаги элчихонаси заҳарланиш ҳолати ҳақидаги хабар 1 ноябрь куни келиб тушгани маълум қилди. Элчихона консуллик хизмати ходими Сакен Пердебеков тезкор равишда шифохонага бориб, жабрланганларга консуллик ёрдамини кўрсата бошлаган.
Ҳозирда беморлар Тошкент шаҳридаги 5-сонли шаҳар клиник инфекция касалликлари шифохонасида даволанмоқда. Дипломатик ваколатхона маълумотига кўра, барча жабрланганларнинг аҳволи барқарор, уларга зарур тиббий ёрдам кўрсатилмоқда.
Қозоғистоннинг Ўзбекистондаги элчиси ҳам шифохонага ташриф буюриб, беморларнинг даволаниш жараёни билан танишган ва жабрланганларнинг ота-оналари билан учрашган. Тиббий ёрдам кўрсатиш масаласи элчининг шахсий назоратига олинган.
Ҳолат Қозоғистон соғлиқни сақлаш вазири Ақмарал Алназарова ҳамда Ўзбекистон соғлиқни сақлаш вазирининг биринчи ўринбосари Отабек Имомов назоратида экани билдирилган.
Жабрланганларга ёрдам кўрсатишга Тошкент тиббиёт университети профессорлари, Санитария-эпидемиология хизмати мутахассислари ва бошқа соҳа экспертлари жалб қилинган. Dostlik Cup 2026 мусобақаси ташкилотчилари ҳам жабрланганларга ҳар томонлама ёрдам бермоқда.
Элчихона вазиятни назорат қилиб бораётганини маълум қилди.
Изоҳлар мавжуд емас