Ўзбекистон, Тошкент - Batafsil.uz. АҚШ Президенти Дональд Трамп воситачилигида икки ой аввал имзоланган сулҳ битими бекор бўлиш хавфи остида. 2025 йил 7 декабрь, душанба куни Таиланд ва Камбоджа ўртасидаги баҳсли чегарада янги тўқнашувлар авж олди ва Таиланд Камбоджа ҳарбий инфратузилмасига қарши ҳаво ҳужумларини амалга оширди.
Икки томон ҳам биринчи зарбани бири-бирига юклмоқда. Бу эса минтақадаги беқарорликни янада кучайтириб, вазиятни кескинлаштирди.
Таиланд армияси вазиятга изоҳ берар экан, ҳаво ҳужумларини жавоб чораси деб атаган.
Хусусан, Бангкок армияси вакили, майор генерал Винтхай Сувареэнинг сўзларига кўра, зарбалар Чонг Ан Ма довони ҳудудидаги Камбоджанинг қурол-яроғ таъминоти позицияларига қаратилган. Бу ҳужумлар Таиланднинг бир нафар аскари ҳалок бўлишига олиб келган Камбоджа ҳужумига жавоб бўлган. Яна етти киши жароҳатланган.
Таиланд Қироллик Ҳаво Кучлари (RTAF) Камбоджани оғир қурол-яроғларни сафарбар қилишда ва ҳарбий амалиётларни кучайтиришга тайёргарлик кўришда айблаган.
Шу сабаб, чегара шаҳарларидан фуқароларнинг тахминан 70% и эвакуация қилинган.
Камбоджа томони эса Таиланднинг айбловларини рад этиб, вазият учун масъулиятни Таиландга юклаган.
Камбоджа Мудофаа вазирлиги қарши томоннинг айбловларини "ёлғон маълумот" деб атаган ва Тинчлик битимларига риоя қилган ҳолда жавоб зарбаси бермаганини билдирган.
Камбоджа армияси Таиланд ҳарбийларини душанба куни эрталаб ўз кучларига ҳужум қилганликда ва бу ҳужум "кўп кунлар давомида кўплаб провокацион ҳаракатлардан сўнг" содир бўлганини таъкидлаган.
Икки давлат июль ойида бўлиб ўтган ва ўнлаб одамларнинг ўлимига сабаб бўлган беш кунлик можародан сўнг, Трампнинг шахсий қўнғироқлари орқали сулҳга келишган эди.
Кенгайтирилган сулҳ шартномаси октябрь ойи охирида Малайзия Бош вазири Анвар Иброҳим ва Президент Трамп гувоҳлигида Куала-Лумпурда имзоланган эди.
Сулҳ имзоланганидан икки ҳафта ўтмай, чегарада мина портлаши натижасида таиландлик аскарлар жароҳатланганидан сўнг, Таиланд томони битим ижросини тўхтатган эди.
Эслатиб ўтамиз, 28 июль куни эрталаб Бангкокдаги Ор Тор Кор бозорида содир бўлган отишмада олти киши ҳалок бўлганди. Ҳуқуқ-тартибот идоралари отишма Таиланд ва Камбоджа чегарасидаги вазиятнинг кескинлашуви билан боғлиқ бўлиши мумкинлигини гумон қилган эди.
Изоҳлар мавжуд емас