Ўзбекистон, Тошкент - Batafsil.uz. Бугун, 28 феваль куни Исроил давлати Теҳрон шаҳридаги Эрон олий раҳнамоси оятуллоҳ Али Хоминаий қароргоҳи яқинида ҳаво зарбаларини амалга оширди. Исроил мудофаа вазири Исроил Кац ушбу амалиёт мамлакатга бўлган таҳдидларни бартараф этишга қаратилган "олдиндан берилган зарба" эканини билдирди ва бутун Исроил ҳудудида фавқулодда ҳолат жорий этилди.
Теҳрон марказидаги кучли портлашлар ортидан шаҳар узра тутун кўтарилган. Исроил ҳарбийлари ушбу зарбалардан сўнг Эрон томонидан ракета ва дрон ҳужумлари бўлиши мумкинлиги ҳақида аҳолини огоҳлантирди, бутун мамлакат бўйлаб ҳаво ҳужумидан огоҳлантирувчи сиреналар янгради.
Мазкур ҳарбий ҳаракатлар АҚШ ва Эрон ўртасида Женевада ўтказилган ядровий дастур бўйича билвосита музокаралар келишувсиз якунланганидан сўнг содир бўлган. АҚШ президенти Дональд Трамп ўзининг "Иттифоқнинг ҳолати" тўғрисидаги нутқида Эроннинг ядровий қурол эгаси бўлишига йўл қўйилмаслигини таъкидлаб, мамлакатни қатъий огоҳлантирган эди.
Айни пайтда Эрон аҳолиси кескинлашиб бораётган вазиятдан хавотирда. Мамлакат ўтган йилнинг июнь ойида Исроил билан бўлган 12 кунлик уруш ва январь ойидаги оммавий намойишлар оқибатида юзага келган ижтимоий-сиёсий инқироздан ҳали тўлиқ чиққани йўқ. Инсон ҳуқуқлари фаоллари маълумотларига кўра, январь ойидаги норозилик чиқишларида 7000 га яқин киши ҳалок бўлган, расмий Теҳрон эса қурбонлар сонини 3117 нафар деб қайд этган.
Изоҳлар мавжуд емас