Ўзбекистон, Тошкент - Batafsil.uz. Бугун, 4 апрель куни Жанубий Корея Конституциявий суди президент Юн Сок Ёлнинг импичментини бир овоздан қўллаб-қувватлаган. Шу тариқа, у ўтган йилнинг декабрь ойида қисқа муддатли ҳарбий ҳолат жорий этилгани сабабли лавозимидан бутунлай четлатилди. Бу ҳақда Batafsil.uz мухбири хабар бермоқда.
ТАСС хабарига кўра, қарорни саккиз нафар судьянинг барчаси бир овоздан қабул қилган. Давлат раҳбарини четлатиш учун улардан олтитасининг овози етарли эди. Ишни кўриб чиқиш чоғида суд Юн Сок Ёл асоссиз равишда ҳарбий ҳолат жорий этишга уриниб, қонунни бузган, деган тўхтамга келган. Мамлакат Конституцияси бундай чораларга фақат уруш, қуролли можаро ёки миллий миқёсдаги бошқа фавқулодда таҳдид шароитида йўл қўяди.
Судьялар собиқ президент парламент биносига ҳарбийларни юбориш орқали армиядан сиёсий мақсадларда фойдаланганини қайд этди. Бундан ташқари, унинг хатти-ҳаракатлари фуқароларнинг асосий ҳуқуқларини бузишга ва конституциявий тузумга путур етказишга олиб келган.
Суд қарорига кўра, Юн Сок Ёл конституцияни ҳимоя қилиш бўйича ўз бурчини бажармаган, ҳарбий ҳолат жорий этиш ва парламент фаолиятини тўхтатиш тўғрисида чиқарган фармони эса ноқонуний деб ҳисобланган.
Мамлакатда 60 кун ичида янги президент сайлови бўлиб ўтиши керак.
Эслатиб ўтамизки, ўтган йилнинг декабрь ойида президент Юн Сок Ёл мамлакатда ҳарбий ҳолат эълон қилгани кенг жамоатчилик эътирози ва аҳоли ўртасида норозилик тўлқинини келтириб чиқарди. Парламент зудлик билан бу қарорга қарши чиқди ва уни бекор қилиш учун овоз берди, шундан сўнг давлат раҳбари чекинишга ва ўз фармонини бекор қилишга мажбур бўлди.
Кўп ўтмай, парламент Юн Сок Ёлга нисбатан импичмент жараёнини бошлаш тўғрисида қарор қабул қилди.
Изоҳлар мавжуд емас