Ўзбекистон, Тошкент - Batafsil.uz. Украина президенти Россия президенти Владимир Путинга очиқ мурожаат билан чиқиб, икки давлат ўртасидаги урушни тугатиш учун тўғридан-тўғри музокаралар ўтказишни таклиф қилди.
Зеленский мурожаатида Украина можарога барҳам бериш тарафдори эканини таъкидлаб, "Украина бу урушни тугатишни таклиф қилади. Буни ҳалол ва муносиб тарзда амалга ошириш, шунингдек янги можаро келиб чиқмаслиги учун кафолатлар яратиш зарур", деган фикрни илгари сурган.
Украина раҳбари эҳтимолий музокаралар учун нейтрал майдон сифатида Швейцария, Туркия ёки араб давлатларидан бирини таклиф қилган. Унинг таъкидлашича, томонлар ўртасидаги мулоқотни бошлаш учун энг муҳим шартлардан бири ўт очишни тўхтатиш ҳисобланади.
Мурожаатда Зеленский Украина музокаралар давомида тўлиқ сулҳ режимига риоя қилишга тайёрлигини билдирган. Унинг фикрича, амалдаги тинчлик муҳити икки томон ўртасидаги мулоқот учун асос яратиши мумкин.
Шунингдек, Украина президенти можаро давомида ҳар икки томон катта йўқотишларга учраганини қайд этган. У уруш туфайли ҳалок бўлган ҳарбийлар ва жабр кўрган оилалар ҳақида тўхталиб, Украина жамияти узоқ муддатли тинчликка эришишдан манфаатдор эканини таъкидлаган.
Ҳозирча Россия расмийлари Зеленскийнинг мазкур таклифи юзасидан муносабат билдирмаган.
Изоҳлар мавжуд емас