Атлантикада круиз лайнерида хантавирус тарқалди: 3 киши ҳалок бўлди

Ўзбекистон, Тошкент - Batafsil.uz. Бутунжаҳон соғлиқни сақлаш ташкилоти (БССТ) Атлантика океанида ҳаракатланаётган "Хондиус" (Hondius) круиз лайнерида хантавирус авж олганини маълум қилди. Ҳозирга қадар 7 кишида касаллик аниқланган бўлиб, улардан 3 нафари вафот этган.

Қурбонлар орасида Нидерландия фуқаролари бўлган эр-хотин ва Германиядан келган йўловчи бор. Касаллик аломатлари апрель ойининг бошида, кема Антарктида ва Жанубий Атлантика оролларига саёҳат қилганидан кейин намоён бўла бошлаган.

Айни пайтда лайнер Кабо-Верде қирғоқлари яқинида тўхтаб турибди, бироқ маҳаллий ҳукумат уларни қабул қилишни рад этмоқда. Кемада бўлган 150 га яқин йўловчи қатъий изоляция режимида сақланмоқда. Беморларни махсус рейс билан Нидерландияга эвакуация қилиш режалаштирилган бўлиб, шундан сўнг кема йўловчиларни тўлиқ тиббий кўрикдан ўтказиш учун Канар оролларига йўналтирилиши кутилмоқда.

Мутахассислар лайнерда одамдан одамга юқиш қобилиятига эга бўлган ягона хантавирус тури — Жанубий Американинг "Андес" вируси циркуляция қилаётган бўлиши мумкинлигини истисно этмаяпти.

Маълумот учун, хантавируслар — бу одатда кемирувчилар (сичқонлар, каламушлар) орқали одамларга юқадиган вируслар гуруҳидир. Ушбу вируслар одамда икки хил оғир шаклдаги касалликни келтириб чиқариши мумкин: геморрагик иситма (буйрак фаолияти бузилиши билан) ёки хантавирусли ўпка синдроми (нафас олиш етишмовчилиги билан).

Бошқа хантавируслардан фарқли ўлароқ, "Андес" вируси одамдан одамга юқиши мумкин бўлган ягона хантавирус ҳисобланади. Бу уни эпидемиологик жиҳатдан хавфли қилади.

Вирус инсон ўпкасини зарарлайди. Бу ўпкада суюқлик тўпланишига (шишга) олиб келади, натижада бемор нафас олишда қийналади. Бу вирус жуда хавфли бўлиб, ўлим даражаси 30 фоиздан 50 фоизгача етиши мумкин.

БССТ ҳозирча аҳоли учун хавф даражаси пастлигини билдириб, ваҳимага тушмасликка чақирмоқда, чунки вирус осонлик билан юқмайди. Инфекцияга қарши махсус даволаш усули ёки вакцина ҳозирча мавжуд эмас.

Январь ойида Ҳиндистоннинг Ғарбий Бенгалия штатида ҳам аниқланган Нипаҳ вируси тиббиёт ходимларига юққан эди. Жаҳон соғлиқни сақлаш ташкилоти ушбу патогенни ўта хавфли деб баҳолаган. Чунки бу вируснинг ҳам давоси йўқ.