Ўзбекистон, Тошкент - Batafsil.uz. Президент Шавкат Мирзиёев Марғилон шаҳрида барпо этилган "Бурҳониддин Марғиноний" илмий-маърифий ва туризм мажмуасининг тантанали очилиш маросимида иштирок этди. Ушбу муҳташам обида Фарғона водийсининг маънавий ҳаёти ва туризм салоҳиятини юксалтиришда муҳим стратегик қадам бўлиши таъкидланди.
Давлатимиз раҳбари ўз нутқида мазкур мажмуа нафақат тарихий меросни тиклаш, балки Янги Ўзбекистоннинг маънавий қудратини ифодаловчи маскан эканига эътибор қаратган. Туркиянинг Studio Vertebra компанияси томонидан лойиҳалаштирилган ва умумий қиймати 1,7 триллион сўмни ташкил этган ушбу лойиҳа 35 гектар майдонни эгаллаб, ўзида анъанавий миллий меъморчилик ва замонавий сервис ечимларини мужассам этган.
Мажмуа таркибидан Ислом ҳуқуқшунослиги институти, мақом театри, ўлкашунослик музейи каби илмий-маданий масканлар билан бирга, "Отабек ва Кумуш уйи" музейи, адиблар хиёбони ва 1500 ўринли муҳташам янги масжид жой олган.
Шунингдек, ҳудудда сайёҳлар учун кенг имкониятлар яратилиб, меҳмонхоналар, карвонсарой, 300 ўринли бозор ҳамда 400 та савдо ва хизмат кўрсатиш нуқталари ишга туширилган. Ушбу марказ тўлиқ қувват билан фаолият бошлагач, вилоятга йилига қўшимча 250 минг нафаргача хорижий сайёҳ келиши, 2 мингта янги иш ўрни яратилиши ва хизматлар экспорти 30 миллион долларга етиши тахмин қилинмоқда.
Президент таъкидлаганидек, тарихда "Маърифат аҳлининг ватани" деб ном чиқарган Марғилон шаҳридаги бу бунёдкорлик ишлари Фарғонанинг шонли ўтмишини қайта тиклашга хизмат қилади. Мазкур мажмуа тажрибаси келгусида Бухоро, Самарқанд ва Қўқон каби тарихий шаҳарлардаги туризм марказларини ривожлантиришда асосий намуна бўлиб хизмат қилади.
Изоҳлар мавжуд емас