Ўзбекистон, Тошкент - Batafsil.uz. Ўзбекистонда “Wildberries”нинг Марказий Осиё логистика хаби пайдо бўлади, у асосий объектларни бирлаштиради ва халқаро савдо йўлларининг муҳим бўғинига айланади. Лойиҳага 300 миллион доллардан ортиқ сармоя киритилади.
Маблағлар логистика инфратузилмасини ривожлантириш, шунингдек, аҳоли ва маҳаллий тадбиркорлар учун янги хизматларни йўлга қўйишга йўналтирилади.
Бу ҳақда компания бош ижрочи директори Роберт Мирзоян 18 июнь куни Тошкент халқаро инвестиция форуми доирасида маълум қилди.
Унинг сўзларига кўра, “Wildberries”нинг халқаро иштирокини кенгайтириш ва логистика салоҳиятини ривожлантириш яқин келажакда ўзбек маҳсулотларини янги истиқболли бозорларга етказиб беришни сезиларли даражада ошириш имконини беради.
Марказий Осиё логистика хабини шакллантириш бир неча йил давом этади. У "Wildberries"нинг мавжуд саралаш мажмуаси ва Тошкент вилоятида қурилаётган тахминан 170 минг квадрат метрлик омбор мажмуасини, шунингдек, компаниянинг бошқа мамлакатлардаги инфратузилмасини бирлаштиради.
Янги хаб минтақадаги Wildberries логистика қувватларини бирлаштиришнинг асосий марказига айланади ва маҳаллий ишлаб чиқарувчиларнинг маҳсулотларини экспорт бозорларига олиб чиқиш учун товар ўтказиш базаси вазифасини бажаради. Ягона логистика узели "Россия - Ўзбекистон - Яқин Шарқ" йўналиши бўйича икки томонлама асосий йўналишларни боғлашни таъминлайди, шунингдек, "Хитой - Ўзбекистон - Африка" йўлаги орқали Африка бозорларига товарлар экспорти учун транзит нуқтасига айланади.
Эслатиб ўтамизки, 2025 йилнинг кузида Тошкентда Wildberries маркетплейсининг янги логистика мажмуаси очилган эди.
Изоҳлар мавжуд емас